آمادگی تاجیکستان به همکاری در انتقال کمک‌ها به افغانستان
۱۴۰۰ آبان ۲۰, پنجشنبه
سفارت تاجیکستان در روسیه اعلام کرده است که در دیدار دولتشاه گل محمد زاده، سفیر تاجکستان در روسیه و توماس نیکلسون فرستاده ویژه اتحادیه اروپا در امور افغانستان در مسکو، وضعیت کنونی افغانستان و تهدیدهای احتمالی برای امنیت منطقه یی مورد بحث قرار گرفت.
به قول خبرگزاری انترفکس، در این دیدار روی اهمیت تقویت همکاری های بیشتر بین تاجیکستان و اتحادیه اروپا، به منظور ایجاد تسهیلات برای رسیدگی هرچه زودتر به بحران داخلی افغانستان، تأکید شده است. به اساس این گزارش به ویژه فراهم ساختن امکانات بیشتر ارائه کمک های بشردوستانه به مردم افغانستان، به شمول نیاز فوری به بازسازی اقتصادی این کشور مورد بحث قرار گرفته است.
در اعلامیه سفارت تاجیکستان در مسکو آمده است: «سفیر تاجیکستان با اشاره به ظرفیت های ترانسپورتی و لوژستیکی کشورش، بار دیگر تأیید کرد که جمهوری تاجیکستان برای حمایت از جامعه جهانی در ارائه کمک های بشردوستانه به مردم افغانستان از طریق خاک تاجیکستان آماده است.»
مرتبط:رئيس جمهور تاجیکستان: در افغانستان حکومت فراگیر با اشتراک نمایندگان همه اقوام تشکیل شود
به تاریخ ۳ نوامبر سال روان امام علی رحمان، رئیس جمهور تاجیکستان، در دیداری با سفیران چندین کشور، آمادگی خود را برای ایجاد یک دهلیز برای ارسال کمک های بین المللی به افغانستان اعلام کرد.
انترفکس / ص.ا، ع.ف