Al Bashir ya kafa kwamitin bincike

Shugaba al Bashir ya bukaci ministan shari'ar kasar Mohammad Ahmad Salem da ya jagoranci kwamitin binciken, sai dai bai fayyace takaimaimen abin da za a bincika ba.

Matakin na zuwa ne bayan kiraye-kirayen da kasashen Amirka da Birtaniya da ma kungiyoyin kare hakkin bil'adama suka yi na a bincika amfani da makaman da jami'an tsaro suka yi da suka kai ga kisan wasu.

Zanga-zangar da aka fara da batun tsadar rayuwa, ta rikide ta koma neman murabus din Shugaba al Bashir, wanda ya yi shekaru 29 yana mulki a Sudan.