Ana fafatawa tsakanin dakarun ƙawance da ´yan tawayen Taliban

An kashe wani sojin kungiyar tsaro ta NATO tare da jiwa hudu rauni a wani hari da aka kai kansu a kudancin Afghanistan da sanyin safiyar yau asabar. Hakan ya auku ne a daidai lokacin da sojojin kawance karkashin jagorancin Amirka hade da dakarun Afghanistan suka tsare wani kwamandan kungiyar Taliban da kuma wasu mutane biyu da ake zargi ´yan tawayen kungiyar al-Qaida ne. Jami´ai sun nunar da cewa sojin na kungiyar NATO ya gamu da ajalinsa yayin wani farmaki da sojojin kawance ke kaiwa ´yan Taliban. Ba´a dai bayyana kasar da sojin ya fito ba da kuma wurin da aka fafatar ba. A jiya juma´a wani bam da aka dana a gefen hanya ya halaka sojin Kanada a lardin Kandahar.