1. Tsallake zuwa shafin jadawali
  2. Tsallake zuwa jadawalin abubuwan da shiri ya kunsa
  3. Tsallake zuwa karin wasu shafukan DW
Mayar da hankali
Ilimin Fasahar Zamani
Shirye-shiryen DW HausaBidiyo
Talabijin kai tsaye
Siyasa

Trump na neman dage zaben shugaban Amirka

Mouhamadou Awal Balarabe
July 30, 2020

Shugaba Trump ya dogara a kan karuwar da ake samu na aikewa da kuri'a ta gidan waya wajen kira da a jinkirta zaben watan Nuwamba, inda ya ce wannan zai iya haifar da magudi da sakamakon zabe maras inganci.

https://p.dw.com/p/3gCDy
US-Präsident Donald Trump
Hoto: picture-alliance/AP Photo/E. Vucci

A karon farko, Shugaban Amirka Donald Trump ya nuna yiwuwar dage zaben shugaban kasa na 3 ga Nuwamba sakamakon yaduwar da annobar corona ke yi a kasar tamkar wutar daji. Cikin wani sakon da ya wallafa a shafinsa na Tweeter, Trump ya ce zaben na fuskantar barazanar "magudi sakamakon zabe mafi karancin inganci da za a gudanar" a tarihin kasar Amirka, lamarin da ya ce zai iya zama "babban abin kunya ga kasar" idan aka samu karuwar yin zabe ta hanyar aikewa da wasiku a gidan waya. Sai dai shugaban bai bayar da wata kwakkwarar hujja game da tsoron da ya ji na magudi da kuste a zaben ba. 

Ana ganin cewa Trump zai fuskanci cikas wajen dage zaben saboda doka ta riga ta kayyade lokacin da ya kamata a gudanar da shi. A halin yanzu dai, kididdigar jin ra'ayin jama'a ta nuna cewa Donald Trump na bayan abokin hamayyarsa Joe Biden na jam'iyyar Democrats a yawan wadanda za su kada masa kuri'a .