Бербок: „Ова е само уште една нова пропаганда од Русија“

Германската министерка за надворешни работи, Аналена Бербок реагира остро на новите најави од Русија дека ќе напаѓа и други области во Украина.

„Русија секогаш користи поинаков аргумент. Овојпат вели дека тоа е поради воената помош. Но, тие и претходно го напаѓаа Киев и други делови на Украина. Значи, се работи само за нова пропаганда од руска страна“, вели германската министерка за надворешни работи во ексклузивно интервју за ДВ. 

Германската поддршка за Украина 

Рускиот министер за надворешни работи Сергеј Лавров претходно за руските медиуми изјави дека руската воена операција во иднина ќе се прошири и во западна Украина. Ќе се напаѓаат цели многу подалеку од сегашната граница на фронтот доколку Западот продолжи да ја „пумпа“ Украина со оружје, предупреди Лавров. Тој ја отфрли можноста за мировни преговори во блиска иднина.

Наспроти ова, германската министерка за надворешни работи Бербок пак ветува натамошна помош од Германија.

„Разгледуваме различни можности за поддршка. Она што можеме да го направиме е да даваме поддршка и во истраги и во деминирање на градови. Даваме поддршка за медицинската помош и за бегалците. И да, ако има работи каде што можеме повеќе да направиме, вклучително и во форма на директна финансиска помош, за што дискутираме во моментов, тогаш ќе ја разгледаме и таа опција“, рече таа. 

Бербок во моментов е на десетдневна „летна турнеја“ низ Германија, под хаштагот #SicherLeben (Безбеден живот). Таа сака да разговара со граѓаните за планираната национална безбедносна стратегија, која започна да ја развива во март годинава. 

Нова политика кон Кина 

Во овој контекст германската влада сака да ја редефинира и својата политика кон Кина. Целта е да се преиспита економската зависност во одредени области, вели Бербок за Дојче Веле, како на пример во однос на темата електромобилност.

„Ако навистина се потпираме на електричните автомобили за да ги оствариме зацртаните климатски цели, тогаш секако ни се потребни батерии. Ние овде немаме производство на батерии за нашите електромобили. Сега се гради еден капацитет, но за сите материјали кои се содржани во батериите имаме зависност од 98%, а од тоа се погодени сите автомобили во Европа“, вели Бербок.

Затоа, Германија тесно ќе се координира со европските партнери и Европската Комисија. Комисијата јасно посочи дека Кина е конкурент за одредени економски прашања, а партнер во борбата против климатските промени, но и системски ривал.

„Бидејќи е и системски ривал, мораме јасно да ставиме до знаење дека никој не може да нѐ уценува, како во случајот со зависноста од Русија,“ вели шефицата на германската дипломатија. Тоа се основите за стратегијата на германската влада за Кина.

„Работиме заедно онаму каде што можеме да работиме заедно, но ние имаме и европска стратегија за независност во делот на критичната инфраструктура, која одговара на нашата надворешна политика“, нагласи Бербок во интервју за ДВ.