Викенд во Белград, бесплатна вакцина

Србија за време на викендот вакцинираше илјадници луѓе од соседните земји БиХ, Северна Македонија, Црна Гора и Хрватска, јавува најголемата германска новинска агенција ДПА.

Се пренесуваат зборовите на белградските политичари, според кои во саботата само во главниот град се вакцинирани 9.600 странски државјани, додека за неделата уште 8.500 вакцини.

Имунизација е извршена и во Нови Сад и во Ниш, пренесува ДПА. „Бројни граѓани на Босна и на Северна Македонија на социјалните мрежи изразија благодарност до Србија.

Во овие две помали балкански земји едвај и да е започнато со вакцинирањето кое штити од заболување поради корона“, додава агенцијата.

Повеќе:

-На вакцинација во Ниш - многумина без термин и во погрешен град

-Македонцки работи: Кој за Врање, кој за Ниш

-Србија: вакцини има, нема кандидати за вакцинирање?

ДПА наведува дека српските власти сакале да остават впечаток дека целата акција е добро планирана преку Економската комора за бизнисмените во регионот, но „на тоа противречат натписите во медиумите и објавите на социјалните мрежи. Според нив, било доволно да се покаже, на пример босански, пасош за да се вакцинира без претходна пријава“:

„Вакцинирањето се вршело со вакцината на АстраЗенека“, пишува весникот Франкфуртер алгемајне цајтунг, „бидејќи великодушноста на Србија има практична причина: земјата располага со големи залихи од оваа вакцина чии рок на употреба наскоро истекува“.

Весникот наведува дека „вакцинирачкиот викенд“ бил „нов успех на регионалната политика на вакцинирање“ на Србија која ја овозможуваат големите кинески испораки.„Според толкувањето на добро информирани извори во Белград, српската влада се плаши дека во Србија наскоро ќе има повеќе од доволно вакцини, но премалку подготвени да се вакцинираат, пишува франкфуртскиот весник.

„Според овие извори, српската Влада разгледува можни државни санкции против лицата кои не сакаат да се вакцинираат. Се споменуваат ограничувања за патувања или правила со кои би им се допуштило само на вакцинираните да посетуваат ресторани или учество во јавни приредби“, пишува весникот, додавајќи оти овие можни санкции за кои се размислува сѐ уште не се готови и дека е нужно да се види дали тие се правно можни.