Закон за јазици: Собранието на раб на инцидент

Собранискиот спикер Талат Џафери попладнево мораше да ја прекине седницата откако пратениците на ВМРО-ДПМНЕ се обидоа да го спречат во обидот да ја најави расправата по точката за Законот за јазици. Најупорен во блокадата беше екслидерот на ВМРО-ДПМНЕ и поранешен премиер Никола Груевски кој се обиде и физички да го попречи Џафери да продолжи да зборува, му го тргна микрофонот и му истури вода на работната маса. Меѓу Џафери и Груевски дојде и вербална расправија, кога собранискиот спикер се обиде да ја напушти салата. Повеќе пратеници на ВМРО-ДПМНЕ претходно ја блокираа собраниската говорница.

ВМРО-ДПМНЕ бара да се одложи расправата за Законот за јазици, или да се овозможи расправа по 35-те илјади амандмани кои тие ги поднесоа на Законот.

Според најавите од Собранието, владејачкото мнозинство сака Законот да се изгласа без расправа по амандманите, односно планира нивно „ан-блок“ отфрлање.

Пред Собранието од попладнево протестираат неколку стотици граѓани кои се противат на донесувањето на Законот за јазици.