„Корона-ситуацијата во Германија уште е многу сериозна“

Без оглед на во последно време малку забавениот пораст на бројот на новоинфицирани, Институтот Роберт Кох уште не констатира промена на трендот. Постои сепак „внимателен оптимизам" што бројките не растат толку нагло, тоа покажува дека Германија не е беспомошно изложена на вирусот, изјави претседателот на Институтот Роберт Кох, Лотар Вилер во Берлин. Но, ние уште не знаеме дали е во прашање стабилен развој, сѐ уште е нејасно во колкав обем е тоа поврзано со најновите ограничувања како затворањето на рестораните, дополни Вилер.

Не е исклучена ни можноста капацитетите на лабораториите за тестирање да стигнат до своите граници. Јасно е истовремено дека ќе расте бројот на пациенти со потешка форма на болеста на одделенијата за интензивна нега, исто како и стапката на смртни случаи. „Мораме да бидеме соочени и со максимално исполнување на капацитетите на болниците", предупреди Вилер.

Дефицит на персонал во клиниките

Речиси половина од болниците во меѓувреме пријавија ограничена достапност на кревети за интензивна нега, што првенствено се должи на инфицирање на персоналот кој од таа причина не стои на располагање, истакна Вилер.

Повеќе на темата:

„Бионтек“: Турското семејство кое ја создаде вакцината против коронавирусот

Германија: Кој, кога и како ќе биде вакциниран против коронавирус

Студија – со корона се заразени четирипати повеќе луѓе од регистрираните

Корона-локдаун? Не, благодарам!

Зачестуваат и случаите на инфекции во училиштата, каде во секој случај мора да продолжи спроведувањето на хигиенските концепти, како носењето заштитна маска. Брзината на распространувањето на коронавирусот е во тесна корелација со однесувањето на луѓето. Зимските услови се отежнувачка околност поради повеќето време кое се поминува во затворени простории, што ги олеснува можностите за пренос на заразата. „Базичните правила – одржување физичка дистанца, носење маска, често проветрување, се работи кои ќе нѐ следат уште неколку месеци", истакна шефот на Институтот Роберт Кох. Според неговата евиденција од утрово, во изминатите 24 часа има 21.866 новодијагностицирани случаи. Вкупната бројка на регистрирани инфекции со коронавирус досега се искачи на 727.553, а на смртни случаи – на 11.982.

Шпан очекува ограничувањата да потраат цела зима

И германскиот сојузен министер за здравство Јенс Шпан не очекува скоро олеснување на воведените мерки заради сузбивање на пандемијата на короновирус, најмалку до пролет. Оваа зима нема да бидат дозволени манифестации со повеќе од десет или петнаесет учесници, изјави тој за радио Берлин-Бранденбург.

Дури и во случај на опаѓање на бројот на новоинфицирани, тоа не значи автоматски можност од декември или јануари да се одржуваат божиќни, новогодишни или семејни прослави „како ништо да не било". Тој ја поздрави одлуката на покраинските здравствени власти на Северна Рајна Вестфалија за порано започнување на Божиќниот распуст за учениците како „прагматична", но решението останува кај секоја одделна покраина.