Бајден и „Букурешт 9“ на средба во Варшава

Два дена пред годишнината од почетокот на руската инвазија на Украина, во Варшава ќе се сретнат американскиот претседател Џо Бајден и претставниците на државите од источното крило на НАТО, или т.н. „Букурешт 9“-формат. Дел од форматот се Полска, Романија, Бугарија, Унгарија, Чешка, Словачка, Естонија, Литванија и Летонија. На разговорите во Варшава ќе присуствува и генералниот секретар на НАТО, Јенс Столтенберг.

Американскиот претседател Бајден во говор во Варшава вчера (21.02) ја предупреди Русија да не се осмелува да го нападне НАТО и го нагласи заедништвото на одбранбената алијанса. „Секоја членка на НАТО знае, а знае и Русија: напад против еден е напад против сите. Света заклетва е да ја браниме секоја педа од територијата на НАТО“, рече американскиот претседател.

Тој нагласи и дека нема да се разниша поддршката за Украина: „НАТО нема да се подели и нема да се умориме“, потенцираше Бајден, кој најави и нови санкции против Русија.

Во говор за состојбата на нацијата вчера рускиот претседател Владимир Путин за војната во Украина го обвини Западот и како политичка опомена кон западните држави објави повлекување на Русија од последниот голем договор за нуклеарно разоружување „Нов Старт“.