Фотографии на денот
Актуелни, занимливи, необични, прекрасни или застрашувачки. Поглед на секојдневието преку редовната #ФотографијаНаДенот на Дојче Веле на македонски јазик.
Историско есенско патување
Хајнрих Хајне не ја опиша само познатата „Лорелај“, туку и есенскити планинскo патување во 1824 година во својата успешна книга „Патување по Харц“. Михаел Лутје од Вернигероде ја пешачи целата рута за 200-годишнината од објавувањето. Тој поминува пешки 150 километри во шест дневни етапи. Носи традиционална облека токму од периодот кога е напишана книгата.
Време е за Октоберфест
Во фестивалските шатори веќе се поставуваат пивски маси, се закачуваат украси и се вршат помали технички работи. Покрај пивото, храната и музиката во фестивалските шатори, Октоберфест вклучува и други атракции како забавен парк со панорамско тркало. Подготовките за 189-тото издание на Октоберфест започнаа на 1 јули. Од 21 септември до 6 октомври се очекуваат околу шест милиони посетители.
Прошетка меѓу диносауруси
Дино паркот е популарна атракција во Букурешт каде семејствата со деца можат да го поминат своето слободно време неколку часа. Паркот зафаќа голема површина, поделен е на неколку области, секоја со свои атракции кои нудат уникатно и возбудливо искуство на откривање на фасцинантниот свет на диносаурусите. Над 30 диносауруси, главно механички управувани, оставаат впечаток дека се реални.
Борба со огнената стихија
Додека луѓето во Централна Европа се борат со големите поплави, во Португалија горат шумите. Особено тешко погоден е северозападниот дел од земјата. Најмалку седум лица веќе загинаа во шумските пожари. Повеќе од 5.000 војници, пожарникари и припадници на цивилната заштита во моментов се борат со пламените јазици. Тие се поддржани од 21 противпожарен авион.
На излет во поле со дива трска
Мајка и син во поле со дива шеќерна трска близу предградие на Дака, главниот град на Бангладеш. Ова поле со дива шеќерна трска во близината на престолнината на Бангладеш е вистинска мала атракција на милионскиот град. Тука доаѓаат бројни посетители, жители на градот, но и туристи, кои впечатливата кулиса ја овековечуваат со селфи снимки.
Првиот снег во Германија
На повисоките места на баварските Алпи падна првиот снег. Снежната покривка е најголема на највисокиот планински врв на Германија - Цугшпице. Со оглед на летните температури до пред само неколку дена луѓето и животните треба да се навикнат на „впечатливата промена на времето“. А речиси и да нема никакво подобрување на повидок.
Човечките кули на Дијада
Кастељерите се наредени до девет нивоа за да ги формираат нивните човечки кули - кастељи. Смелите човечки конструкции во шпанската автономна област Каталонија се традиција од почетокот на 19 век, а од 2010 година тие се светско нематеријално културно наследство на УНЕСКО. Здруженијата на кастељерите, Кољес, се натпреваруваат меѓу себе во натпревари во градските центри.
Ѕвездена поддршка
Нејзиниот збор има голема тежина кај милионите обожуватели. Американската музичка мегаѕвезда Тејлор Свифт, непосредно по ТВ-дуелот меѓу претседателските кандидати Камала Харис и Доналд Трамп, го вети својот глас за Харис.
Некогаш рудник, наскоро соларен парк
На поплавениот поранешен површински коп на јаглен кај Котбус, се гради пловечки соларен парк, најголем од ваков вид во Германија. Планирано е системот со сила од 29 мегавати да биде пуштен во употреба во зимата 2024/2025 година. Електричната струја произведена од овој фотофолтаички парк ќе може да ја покрие годишната потрошувачка на 8250 домаќинства.
100 дена без дожд
Повеќе од една третина од територијата на Бразил во моментов е погодена од екстремна суша. Тоа значи дека повеќе од 12,5 милиони луѓе не виделе дожд повеќе од три месеци. Неколку градови се отсечени од надворешниот свет бидејќи реките не се пловни поради нискиот водостој. Шумски пожари беснеат во повеќе региони.
Контра законите на физиката
Гатка е древна боречка вештина која Сиките ја практикуваат и за ритуални цели - како во оваа поворка во близина на Златниот храм во Амритсар, северна Индија. Поводот е важна годишнина во чест на нивното свето писмо, Гуру Грант Сахиб. Религијата на Сиките настанала во 15 век и главно е распространета во Индија.
Тажната повторна средба со потопено село во Грција
Не секоја повторна средба е среќна: во случајот со грчкото село Калио, тоа е повеќе причина за загриженост. Селото во грчките планини нормално треба да е невидливо. Пред неколку децении, Калио беше поплавено и потона во акумулацијата Морнос, која го снабдува главниот град на Грција, Атина со свежа вода. Екстремната суша предизвика акумулацијата да се намали за една четвртина во рок од две години.
Славје за Карибите
Како и секоја година, на почетокот на септември, Њујорк е домаќин на парадата на Денот на Западна Индија - шарена поворка во чест на карипските земји како Тринидад и Тобаго, Хаити и Јамајка. Парадата слична на карневал постои од 1930-тите години. Оваа година, меѓутоа, фестивалот остана во сенка на нападот во кој неколку луѓе беа повредени од огнено оружје.
Бојата на љубовта
Бојата на љубовта доматно црвена. И бојата на субверзијата. Особено за време на шпанскиот фестивал Томатина, на кој 20.000 опуштени учесници секоја година се гаѓаат со презрели плодови на домати. Последиците не само што се земаат предвид, туку и се посакувани: на крајот од едночасовната борба со доматите, славениците во градот Буњол во шпанскиот регион Валенсија, тешко можат да се препознаат.
Параолимписки игри во Париз: Повик за револуција на инклузијата
Четворица учесници на Параолимписките игри го запалија олимпискиот оган на отворањето во Париз. 11 денови 4400 спортисти од цел свет ќе се натпреваруваат во 22 спортови. „Пред 225 години Плас де ла Конкорд беше центар на француската револуција. Се надевам дека сега овде ќе скокне искрата на револуцијата на инклузијата“, рече претседателот на Меѓународниот параолимписки комитет, Ендри Парсонс.
Сончеви дамки
Секако дека сончевите дамки не можеме да ги видиме без силни филтри, а посебно не во Кувајт, каде е направена оваа фотографија. Површината на сонцето е исклучително активна, постојано настануваат и исчезнуваат дамки. Тие се привремени појави на фотосферата на Сонцето и одговараат на концентрацијата на флуксот на магнетно поле. Бројот на сончеви дамки варира во согласност со 11 годишен циклус.
Карневал во Провинстаун
Карневалот во Провинстаун се одржува од 1978 година. Годинава темата беше „Ренесанса Х Револуција“. Овие учесници на парадата, која е главен дел на фестивалот, ја имаат сосема погодено темата.
Пронајден огромен дијамант
Претседателот на Боцвана, Мокгветси Масиси, држи огромен дијамант, најверојатно втор по големина во светот. Дијамантот, голем колку авокадо, е пронајден во рудник на канадската компанија Лукара Дајмонд Корп во Боцвана и има 2.492 карати. За квалитетот на дијамантот сѐ уште нема точни информации, но се вели дека тој е со „висок квалитет“.
Биоразградлива уметност
Огромно биоразградливо уметничко дело на светски познатиот француско-швајцарски уметник Сајпе. Ова монументално дело на Сајпе со наслов „Мостови?“ е поставено во Фрајбург, по повод 125-годишнината на Фрајбург Туризам. Направено е со биоразградливи пигменти од јаглен, креда, вода и млечни протеини. Сајпе, кој комбинира улична уметност и ленд-арт, се смета за пронаоѓач на еколошкото сликарство.
Качување на стебло
Искачување на стебло високо 4 метри, кое е намачкано со масло - традиционална игра „Панџат Пинанг“ во Индонезија. Според традицијата, тимовите имаат за задача што побрзо да стигнат до предмети кои се обесени на врвот на високото стебло. Маслото го прави стеблото многу лизгаво, па до предметите може да се стигне само со многу тимски дух, сила и истрајност.
Скокачот од Ѓаковица
Учесник во натпреварот во скокови во вода во Ѓаковица, Косово, скока од мостот „Ура е Шењт“ во водите на реката Бел Дрим. Скоковите се одржуваат уште од 1954 година.
Цветен тепих во центарот на Брисел
Стотици илјади бегонии и далии го красат срцето на Брисел: тепихот со ефемерен сјај, кој секоја втора година се распостила на Големиот плоштад во средината на август, е долг 70 метри, а широк 24 метри. Неговата површина изнесува 1680 квадратни метри, а направен е од тим кој се состои од 100 градинари.
Мирис на божиќни колачи среде лето
Предбожиќно време во Анаберг-Бухолц: една пекарница уште сега го полни својот склад за идната сезона. Антје Шмидел-Виртел ги испече првите илјада традиционални божиќни колачи – штолен. До Божиќ, до кога што остануваат околу 130 дена, пекарницата планира да произведе 200 тони од популарните колачи. Штолен е баран не само во Саксонија, туку низ цел свет.
Небесен спектакл над насипот
Секој што погледнал во небото во Германија во изминатите неколку ноќи, можеби ќе можел да ги забележи: поларната светлина во блескави бои, ишарана со некои светли ѕвезди што на момент блеснуваат. Персеидите, најголемиот метеорски дожд во годината, го достигнаа својот максимум во вторникот вечерта - и можеби ги маѓепса овие овци на насипот на Северното Море во северна Германија.
Зоолошката градина на Бенкси
Сликите со животни на Бенкси одамна станаа магнет за публиката. Осум такви графити на Бенкси веќе можеа да се видат во Лондон. Ова е деветти во серијата која започна пред повеќе од една недела - горила држи отворени ролетни во зоолошка градина за таа и другите животни да можат да избегаат. Една фока и неколку птици веќе се надвор.
Скокови во прекрасен амбиент
Олимписките игри завршија. Но, скокачите во вода не прават пауза. Тие брзо пронајдоа нова локација за нивниот омилен спорт во Словенија. Од крајот на 80-тите години, малиот словенечки град Канал на Соча привлекува десетици адреналински зависници кои ги покажуваат своите вештини скокајќи од мостот висок 17 метри. Мостот е градско обележје и секој август е сцена на спектакуларно скокање во вода.
Спектакуларен крај на извонредната Олимпијада
Олимписките игри во Париз беа затворени доцна во неделата вечер (11.08.2024) со шаренолика церемонија на затворање. Фокусот беше на спортистите - и обединувачката моќ на олимписките прстени. Се претстави и Лос Анџелес, градот домаќин на наредните Летни игри во 2028 година.
Нова ерупција на Етна – проблеми за аеродромот во Катанија
По привременото затворање во неделата, работата на аеродромот во Катанија повторно се одвива, но можно е анулирање на летови или нивно доцнење, соопштија од управата на аеродромот Катанија-Фонтанароса. Италијанскиот национален институтот за геофизика и вулканологија извести за десет километри високи облаци од чад и силна вулканска активност на Етна со исфрлање лава во неделата утрото.
Отпадот на Олимпијадата
На крајот доаѓа метлата - сцена од Олимписките игри во Париз по натпреварите во стрелање. На Олимпијадата се создава многу отпад, но не го произведуваат само навивачите на трибините, туку и опремата на спортистите. На оваа фотограија е фатен моментот додека се метат чаурите кои остануваат зад стрелците за време на натпреварите во стрелање.
Честит Илинден!
Македонските граѓани прославуваат 121 година од Илинденското востание и прогласувањето на Крушевската Република, како и 80 години од Првото заседание на АСНОМ. Премиерот Мицкоски во Крушево, претседателката Сиљановска Давкова во „Св.Прохор Пчински“ а претседателот на Собранието, Гаши во Скопје ги предводат делегациите на чествувањето на Илинден, кој годинава се одбележува под слоган „Борбата трае“
Сигурен погодок
Kошаркарски фан на Олимписките игри во Париз кој секогаш постигнува сигурен погодок! Со кош и баскет на глава на натпреварот во кошарка 3х3 помеѓу Летонија и Литванија на Олимписките игри во Париз. Победник беше Летонија, а радоста на навивачите, како на човекот на оваа фотографија - неизмерна.