Годишнина од тетовската трагедија: Колку вреди еден живот?

Мумин Исмаили од селото Нераште е последниот кој што се извлече од огнените јазици на пожарот во модуларната болница во Тетово. Во пожарот кој избувна на 8 септември 2021 година и за неколку минути ја претвори во пепел монтажната градба, загинаа 14 луѓе. Меѓу нив, и мајката на Исмаили. Тој бил со неа до последните мигови, но не успеал да ја спаси. Тоа го прогонува до денес.

„Кога ќе легнам дома да спијам, секогаш кога ќе ги затворам очите почнувам да размислувам на сѐ ова. Како ми викаше мајка ми „Пушти ме мене сине, излегувај ти“. Веќе една година се направија, секоја вечер кога ќе легнам, ми доаѓа тоа“, раскажува Исмаили за ДВ.

Тој и роднините на другите жртви сѐ уште чекаат одговор од државата: зошто се случи трагедијата? Исмаили бара правда, но не очекува дека ќе ја добие.

„Што да очекувам од државата? Да ми ја врати мајка ми, не може. Отиде веќе. Не умре, изгоре, со четврти степен. Нема да ми ја врати мајка ми. Што да очекувам од државата? Од државата ништо. 

Откако се случи ова, по три – четири недели почнаа митинзите од партиите. Не знам за што.

Човечкиот живот овде, како да ти кажам, не вреди ништо“, вели Исмаили.

Погледнете ја исповедта на Мумин Исмаили во ова видео.