Грипот зеде 14 животи годинава

Четиринаесет лица починале од грип годинава, од кои најголемиот број случаи се во Скопје. Станува збор за седум жители на главниот град, додека два смртни случаи имало во Штип и по еден случај од Велес, Куманово, Неготино, Гостивар и Демир Хисар. Седуммина од починатите биле на возраст од 15 до 64 години и седуммина од возрасната група над 65 години.

Според податоците од најновиот извештај на Институтот за јавно здравје, станува збор за невакцинирани лица против сезонски грип, кои биле хоспитализирани, а повеќе од нив имале коморбидитети. 

Пикот помина

Сезоната на грип полека поминува. Пикот е забележан во февруари, кога биле евидентирани 6.373 случаи на лица заболени од грип. Веќе во март се забележува опаѓање на бројот на заболени и евидентирани се 1.108 случаи.

Во периодот од 25 феварари до 31 март во Северна Македонија се пријавени 163 случаи на групни пријави за заболени од грип/заболувања слични на грип, што е 38,5% помалку во споредба со претходната недела. Најголем број од нив се лица на возраст од 15 до 64 години.

Во сезоната 2023/2024, вкупниот број на случаи на грип/заболувања слични на грип изнесува 14.490. Во споредба со истиот период од минатата сезона, бројот на пријавени случаи е зголемен за 41,8 отсто.

Вакцинацијата и понатаму е најдобра превенција од последиците од грип. Според ИЈЗ, во земјата изминативе месеци вакцинирани се вкупно 61.823 лица со бесплатна или комерцијална вакцина.

Нови случаи на пертусис

Има тренд на намалување и кај заболените од голема кашлица, но таа и понатаму е присутна, пред сѐ меѓу најмладите. Во периодот од 29 март до 4 април пријавени се 50 нови случаи на голема кашлица, што е намалување од 21,9% во споредба со претходниот период. Најголем дел од случаите се пријавени во рамките на епидемијата во Скопје, а пријавени се случаи и во Битола, Тетово и по еден случај во Гостивар, Кратово, Велес и Гевгелија.

Возраста на заболените се движи од 1 месец до 52 години, а најголем број на случаи се од возрасната група 0-4 години. Од новите 50 случаи, 9 случаи (18,0%) се хоспитализирани.

Освен во Скопје, епидемија на голема кашлица беше прогласена и во Куманово, каде има 23 заболени. До 4 април во земјата се регистрирани вкупно 399 случаи на голема кашлица.

Од вкупниот број на регистрирани случаи (399), 239 случаи (односно 59,9%) не биле вакцинирани, не се комплетно вакцинирани согласно возраста или нема доказ за вакцинација. Од заболените, хоспитализирани се 58 лица, и тоа 49 од нив на возраст до 4 години.

Од доставените податоци од Центрите за јавно здравје, пронајдени се 8.192 деца пропуштени за вакцинација, од нив се вакцинирани 4.517 (55,1%). Согласно возраста и Календарот за редовна вакцинација, вакцинирани се 12.365 деца на возраст до 7 години.