Напад врз сопругот на Пелоси - провалникот ја барал Ненси

Напаѓач кој провалил во куќата на амерканската политичарка Ненси Пелоси, со чекан го повредил нејзиниот 82-годишен сопруг. Спикерката на Претставничкиот дом во моментот на инцидентот не била во куќата. Според функцијата, Пелоси во политичката хиерархија на САД се наоѓа на трето место, зад претседателот Џо Бајден и потпретседателката Камала Харис.

Претседателот Бајден најостро го осуди нападот, повлекувајќи врска меѓу него и агресивната реторика на републиканците на екс претседателот Доналд Трамп.

Провалникот ноќта кон петокот го загрози животот на Пол Пелоси, барајќи ја Ненси Пелоси,  соопшти нејзиниот портпарол утрово. Пол Пелоси вчера бил опериран поради повреда на черепот и сериозни повреди на раката и дланките, а лекарите очекуваат негово комплетно заздравување.

Пелоси се наоѓа под постојана заштита на телохранители, таа ноќта кога бил извршен нападот била во Вашингтон, додека нејзиниот сопруг останал во нивната куќа во Сан Франциско.

Полицијата по примен повик стигнала во куќата на Пелоси и го совладала 42-годишниот напаѓач, кој се наоѓа во притвор, а за случајот и за мотивите за извршеното дело се води истрага, соопшти шефот на полицијата Вилијам Скот.

Напаѓачот повеќепати извикувал „Каде е Ненси?“, пишуваат меѓу другите „Вашингтон пост“ и „Њујорк тајмс“, повикувајќи се на извори на владини претставници.

СиЕнЕн извести дека Пол Пелоси успеал да го заврти телефонскиот број за помош, и иако не можел директно да го пријави нападот, соработничката на линијата ги чула звуците во позадина и испратила полиција. Намерата на провалникот наводно му била да го врзе Пол Пелоси и да го сочека враќањето на неговата сопруга.

Американските медиуми го пронашле интернет профилот на осомничениот, кој според нив се интересирал за теории на заговор,  лажни информации  и за наводната опасност од вакцината против Ковид, како и за лагите на Доналд Трамп за наводно „украдените претседателски избори" во 2020 година.

Демократката Пелоси  е често мета на вербални напади од таборот на политичката десница во САД. Доналд Трамп со години постојано ја нарекува „лудата Ненси“, правејќи ја објект на омраза кај своите следбеници. При упадот во Капитолна 6 јануари 2021 година, симпатизерите на Трамп продреа и го демолираа и кабинетот на Пелоси.

Истакнати републиканци, како вицепретседателот на Трамп, Мајк Пенс и лидерот на републиканците во Сенатот, Мич Мекконел го осудија нападот врз сопругот на Пелоси. На претстојните избори, на Републиканската партија ѝ се даваат добри шанси да го поврати мнозинството во Претставничкиот дом, по што Пелоси би заминала во пензија.