Неколку експлозии го потресоа центарот на Киев

Украинскиот главен град Киев утрово повторно е потресен од експлозии, точно една недела по жестоките руски ракетни напади. Според  градоначалникот Витали Кличко,  една од експлозиите се случила во централната населба Шевченковски, прометна област со универзитети, барови и ресторани.

Кратко пред нападите, сирените за тревога предупредиле од опасност од воздушни напади, а градоначалникот Кличко преку социјалните мрежи апелирал до жителите да останат во засолништа. Оштетени се повеќе станбени згради, а на мета повторно се и инфраструктурни објекти.

Според информации од претседателскиот кабинет,  украинската престолнина била нападната со дронови.  „Русите веруваат дека ова ќе им помогне, но тоа само го одразува нивниот очај“, изјави Андриј Јермак, шефот на кабинетот на украинскиот претседател Володимир Зеленски. 

Дописникот на Дојче Веле, Фани Фаскар, извести за неколку експлозии, велејќи дека бучавата која претходела наликувала на звук на дрон. Фаскар, исто така, ги потврди извештаите за нови експлозии околу еден час подоцна.

Минатонеделните напади се сметаа за одмазда за  експлозијата на Керчкиот мост  што ја поврзува континентална Русија со Крим, за која Кремљ смета дека е дело на украинската тајна служба. Руската армија како одговор ги нападна Киев и повеќе други градови во Украина, при што загинаа најмалку 19 луѓе, а 105 беа ранети, а цел на нападите беа пред се` инфраструктурата и енергетското снабдување.

Рускиот претседател Владимир Путин во петокот изјави дека во руските напади не биле погодени сите планирани цели, иако смета дека не се потребни нови толку масивни удари како пред една недела.