Железнички хаос во северна Германија поради саботажа
8 октомври 2022
Причината за денешните повеќечасовни проблеми во железничкиот сообраќај во северна Германија е саботажа на каблите за комуникација, соопшти Германската железница- Дојче Бан (ДБ).
„Поради саботажа на каблите кои се неопходни за железничкиот сообраќај, комплетниот сообраќај на северот на Германија мораше да биде запрен три часа“, изјави портпаролка на ДБ. Таа нагласи оти надлежните безбедносни служби започнале истрага за случајот.
Прекинот на железничкиот сообраќај предизвика тревога откако НАТО и ЕУ во минатиот месец ја нагласија потребата за заштита на клучната инфраструктура, по „саботажата“ на гасоводот Северен тек.
Утрината Дојче Бан соопшти дека причина за запирање на железничкиот сообраќај, со што беа погодени и главните линии меѓу Берлин, Хамбург и Келн, е грешка во системот за комуникација меѓу машиновозачите и сообраќајните диспечери.
Претпладнето сообраќајот беше повторно воспоставен, но доцнењето и „испаѓањето“ на возовите би можело да продолжи и во текот на денот.
Воспоставен е сообраќајот на возовите кон Данска и кон Холандија кои поради немање комуникација беше запрен.