Путин со нови детали за смртта на Пригожин
6 октомври 2023
Рускиот претседател Владимир Путин во четвртокот изјави дека авионската несреќа во која загина Евгениј Пригожин, шеф на платеничката група Вагнер, била предизвикана од рачни бомби кои експлодирале во авионот, а не од ракетен напад.
Приватниот авион Ембраер со кој Пригожин патуваше за Санкт Петербург се урна северно од Москва на 23 август, при што загинаа сите 10 патници, меѓу кои и двајца други високо рангирани оперативци на Вагнер, четворица телохранители и тројца членови на екипажот.
Путин посочи дека авионот бил разнесен одвнатре, велејќи дека тоа му го кажал шефот на рускиот истражен комитет пред неколку дена.
„Во телата на загинатите во несреќата се пронајдени фрагменти од рачни гранати“, рече Путин на состанокот на дебатниот клуб Валдаи во црноморското одморалиште Сочи.
„Нема надворешен напад на авионот, тоа е веќе утврден факт“, рече Путин.
Со тоа, тој навидум ги отфрли тврдењата на неименуваните американски функционери кои набрзо по несреќата рекоа дека веруваат дека авионот бил соборен.
Путин не даде повеќе детали за тоа како бомбите би можеле да бидат активирани во авионот, но рече дека смета оти инспекторите згрешиле што не ги тестирале телата на убиените на дрога и на алкохол, со оглед на количеството кокаин пронајдено во канцеларијата на Вагнер во Санкт Петербург во минатото.
Истражителите на несреќи сè уште не ги објавија своите наоди.
Бунтотна Пригожин беше најголемиот предизвик за владеењето на Путин откако поранешниот шпион на КГБ дојде на власт во во Русија од 1999 година. Западните дипломати тврдат дека обидот за пуч на Вагнер го разоткрил притисокот во Русија поради војната во Украина.