Русија е загрижена поради „провокациите“ во Грузија

Кремљ ги обвини САД за поттикнување антируски чувства кај илјадниците демонстранти кои неделава излегоа на протести на улиците на Грузија. „Гледаме од каде претседателката на Грузија му се обраќа на народот. Таа не се обраќа од Грузија, туку има обраќање од Америка“, изјави портпаролот на Кремљ, Дмитри Песков пред новинарите, обвинувајќи „нечија невидлива рака“ за поттикнување „антируско“ расположение. Според Песков, Москва „со загриженост“ ја следи ситуацијата.

Грузискиот парламент денеска (10.03) го повлече планираниот закон со кој странските медиуми и организации требаше да се означуваат како „агенти“. Најава за повлекување на законот дојде вчера, од страна на владеачката партија Грузиски сон. Против законот, во второ читање, денеска гласаа 35 пратеници, а „за“ беше само еден. Голем број пратеници кои пред само неколку дена гласаа за законот во прво читање, сега не присуствуваа на седницата.

Законот потсетува на сличен таков закон во Русија, со кој многу независни медиуми, но и невладини организации, беа означени како „странски агенти“. Регулативата беше критикувана на меѓународно ниво како политички мотивирана мерка која има за цел да ги стигматизира и замолчи критичарите. Кремљ презема масовни акции против дисидентите во земјата особено по почетокот на руската инвазија на Украина.

Против планираниот закон за странски агенти во Грузија со денови има демонстрации, меѓу другото и денеска. Додека во пратениците гласаа за законот, пред парламентот имаше нов собир на проевропските демонстранти.