Смртоносна автобуска несреќа во Хрватска

Во тешката несреќа на полски автобус во близина на градот Вараждин во Хрватска утрината загинаа 12 патници кои оделе на аџилак во Меѓугорје, а најмалку 34 се повредени, соопшти полскиот премиер Матеуш Моравјецки.

„Премиерот на Хрватска, Андреј Пленковиќ, ми гарантираше дека во целост ќе бидат ангажирани хрватските служби“, напиша на Твитер премиерот Моравјецки.

Автобусот утрината во 5 часот и 40 минути излетал во ендек покрај патот кај Брезнички Хум во Вараждинската жупанија од засега непознати причини, а сите патници биле Полјаци, јавуваат хрватските и полските медиуми.

На лице место настрадале 11 луѓе, а едно лице починало подоцна поради последици од тешки повреди.  Како што јавија хрватските медиуми припадници на полицијата, медицинските екипи и пожарникарите се на терен, а во Вараждин се дојдени и потпретседателите на хрватската влада, министрите за внатрешни работи и за одбрана, Давор Божиновиќ и Томо Медвед. 

Покрај хрватските претставници на местото на несреќата тргна и полскиот министер за здравство, Адам Нједелски, и заменик шефот на полската дипломатија, Марчин Пшидач.

„Не знаеме како се случила сообраќајната несреќа, ни колку точно патници имало во автобусот. Како што јавуваат хрватските медиуми поголемиот дел од повредените се деца. Повреди од различен степен здобиле 34 лица. Сите жртви се Полјаци“, изјави за полската телевизија Полсат, портпаролот на полското Министерство за надворешни работи, Лукаш Јасина.

Претседателот на Полска, Анджеј Дуда, изрази сочувство до семејствата на жртвите во несреќата и увери дека полските власти прават сѐ за да им помогнат на повредените и преживеаните патници на лице место.