Борис Џонсон си поднесе оставка

Британската влада попладнево потврди дека шефот на дипломатијата Борис Џонсон одлучил да си поднесе оставка на функцијата, поради несогласување со политиката на премиерката Тереза Меј. Ова е втора оставка во владата на Меј за неполни 24 часа откако беше објавена одлуката за стратегијата за напуштање на Европската Унија. Оставката на Џонсон ќе биде уште еден тежок удар за Меј и нов показател за длабокиот јаз кој постои во владата на конзервативците околу напуштањето на ЕУ.

Меј на крајот на минатата недела ја усвои стратегијата за ткн. „мек Брегзит“ која предвидува зона на слободна трговија со ЕУ за индустриски и земјоделски производи. Во делот на трговијата, Британија и натаму ќе треба да се придржува до заедничките правила со ЕУ.

Претходно, оставка поднесе и британскиот министер Дејвид Дејвис . На местото на Дејвид Дејвис, кој досега ја предводеше британската преговарачка делегација за Брегзит и му беше партнер за разговори на претставникот на Европската Комисија, Мишел Барние, е назначен Доминик Раб, досегашен државен секретар во британското министерство за градежништво.

Борис Џонсон беше предводник на кампањата за Брегзит во текот на референдумот и во преговорите за напуштање на Унијата ја застапуваше политиката на „тврд Брегзит“, односно целосно расчистување и одделување на Британија од ЕУ.