Бројот на загинати во пожарите во Грција расте

Во катастрофалните пожари во Грцијаспоред последните информации загинале најмалку 88 лица, објави денеска грчкото државо радио (ЕРТ), повикувајќи се на властите. Во животна опасност се наоѓаат уште десет луѓе.  Голем број лица и натаму се водат како исчезнати

Полицијата претпоставува дека идентификацијата на жртвите на основ на донираните примероци на ДНК од страна на роднините во лабораториите во Атина ќе трае уште неколку дена. Дури тогаш  ќе биде јасно колкав е точниот број на исчезнати лица.

На кризна седница на владиниот кабинет во Атина, грчкиот премиер Алексис Ципрас истакна дека е  длабоко потресен поради големиот број жртви во катастрофалните шумски пожари во Грција. Жртвите на огнената стихија ги загубија животите на неправеден и на неверојатен начин, истакна Ципрас.

„Преземам целосна политичка одговорност за оваа трагедија", рече тој во обраќањето пред министерите, кое беше пренесувано и на телевизија. Тој ги повика и министрите да го сторат истото.

Премиерот, меѓ другото, упати апел сите кои се бореа да спасат илјадници луѓе за време на огнената стихија да бидат поштедени од критики: пожарникарите, полицијата, крајбрежната стража, војската и нивните раководства, сите кои, како што рече Ципрас, се бореле со чувство на должност, јуначки ризикувајќи ги своите животи. 

Инаку вчера билансот на жртвите беше коригиран на 87, откако спасувачите пронајдоа уште пет мртви тела во изгорените куќи во местото Мати во близина на Атина. Во катастрофата загинаа толку многу луѓе како во ниеден друг пожар во Европа во 21-от век.