Како ќе изгледа денешното затворање на Олимпијадата?

„Кралицата и принцот Филип остануваат во Балморал“, изјави во саботата портпаролот на Бакингемската палата, демантирајќи ги написите во медиумите дека кралицата ќе присуствува и на церемонијата на затворањето на Игрите.

Наспроти тоа, Спајс Грлс во полн состав ќе бидат дел од свеченоста на затворањето, а на стадионот ќе бидат донесени со популарното лондонско црно такси. Медиумите веќе објавија фотографии од овонеделните проби на стадионот Дегенхам.

Иако според британските медиуми ќе биде тешко да се надмине инвентивноста од свеченоста на отворањето на Олимписките игри Лондон 2012, на кои кралицата Елизабета Втора „дојде со хеликоптер“ во придружба на Џејмс Бонд, сепак хуморот и музиката ќе доминираат и на оваа свеченост.

Според музичкиот режисер Дејвид Арнолд, композитор на филмска музика за неколку филмови со Џејмс Бонд, оваа церемонија на затворањето има цел „да го опфати духот на овие игри, коишто се лесно архаични, малку палави, смешни, чувствителни, егзалтирачки и толку ’бритиш’“.

Затворањето ќе претставува симфонија од британска музика, објасни во саботата на прес-конференцијата уметничката директорка Ким Гавин. Според неа, шоуто ќе трае 2 часа и 45 минути и ќе содржи повеќе од еден час музика. Во голема тајност беа држени деталите од свеченото затворање, меѓутоа многу уметници го потврдија своето учество, меѓу кои се славните Монти Пајтон, Џорџ Мајкл, Мјуз и Ед Ширен. Групата Меднес, којашто претставуваше сензација на јубилејот на 60-годишната од стапувањето на престолот на Елизабета Втора, свирејќи од покривот на Бакингемската палата, исто така, ќе учествува на свеченоста на затворањето на Олимпијадата, како и Ху и Брајан Меј од Квин.

Лондон вечерва ќе го предаде организирањето на бразилската метропола Рио де Жанеиро, каде што ќе се одржат следните Летни олимписки игри во 2016. година, а кој ќе има осум минути да се претстави со глобално популарната самба, капоерата, тапаните и карневалските костими.

На крајот, претседателот на Меѓународниот олимпискиот комитет Жак Рог официјално ќе го прогласи крајот на овие летни игри, по што ќе биде изгаснат и олимпискиот оган, кој гореше 16 дена.