Трамп го прекори својот експерт за заразни болести

Американскиот претседател Доналд Трамп им вети на Американците вакцина за КОВИД-19 за многу брзо време во доволни количества. „Штом Агенцијата за лекови на САД (ФДА) ја одобри вакцината, ќе можеме да распределиме 100 милиони дози до крајот на годинава - и голем број многу порано“, рече Трамп во Белата куќа. Директорот на американскиот здравствен орган ЦДЦ, Роберт Редфилд, пак, наведе временски хоризонт до средината на 2021 година.

„Ако ме прашате кога ова ќе биде општо достапно за американскиот народ, за да можеме да ја користиме вакцината и да се вратиме во нормалниот живот, тогаш мислам дека гледаме кон крајот на вториот или третиот квартал од 2021 година“, изјави Редфилд на сослушување во Сенатот. Тој беше под заклетва.

„Мислам дека тој најверојатно погрешно го сфати прашањето“, рече Трамп пред новинарите за зборовите на Редфилд. „Мислам дека беше збунет“.

„Маските поважна од вакцината“

Редфилд, исто така, објасни во Сенатот дека маските во моментов се „најважната алатка“ во борбата против пандемијата. Тој дури, како што изјави, смета дека маската нуди подобра заштита од коронавирус отколку вакцинацијата.

Повеќе:

-Германија: „Веројатни“ се повеќе корона-вакцини

-Науката и националното се судираат во трката за вакцина

-Запрено истражување на вакцина против Ковид-19

Трамп му противречи и за ова: „Не, вакцината е многу поефикасна од маските“. Тој додаде дека му се јавил на Редфилд и му рече дека  погрешно го одговорил прашањето.

Пандемијата во предизборната кампања

Корона-кризата со повеќе од 195.000 смртни случаи во САД стана важна тема во предизборната кампања за Белата куќа. Трамп неколку пати најавуваше дека вакцината може да се одобри до крајот на октомври - а со тоа и пред претседателските избори на 3 ноември. 

Поради ваквите изјави, неговиот предизвикувач Џо Бајден истакна дека Трамп е несоодветен за највисоката функција во земјата. „Првата задача на претседателот е да го штити американскиот народ, а Трамп нема да го стори тоа. Тоа целосно го дисквалификува", рече кандидатот за претседател на Демократската партија по состанокот со здравствени експерти во сојузната држава Делавер.