Коха Диторе: Албанците од јужна Србија бараат национално обединување со Косово

Според пишувањето на „Коха Диторе“ што го пренесува агенцијата МИА, Албанците сакаат да ја реализираат оваа цел станувајќи дел од косовската делегација на идните разговори меѓу Косово и Србија, кои се планира да почнат наесен.

Градоначалникот на Бујановац Јонуз Муслиу, оценува дека учеството на претставниците од оваа област ќе и‘ биде на помош на косовската делегација. „Претставниците на народот од овој дел треба да бидат дел од разговорите и ние бараме да бидеме дел од косовската делегација. И разбирливо ние ќе бидеме силна страна во решавањето на политичкиот проблем во Прешево, Медвеѓе и Бујановац“, вели Муслиу за „Коха Диторе“.

Според него, годинава, кога се одбележува стогодишнината од прогласувањето на независноста на Албанија, прашањето на Албанците од Прешевската долина треба да се реши и трите албански општини треба да се обединат со Косово.

Барањето на Муслиу да бидат дел од косовската делегација на разговорите Приштина-Белград, ја поддржал и претседателот на здружението „Ватра“ Сејдула Кадриу.