Меркел повикува на солидарност и сака силна Европа

Германија е во добра позиција да финансира опсежна финансиска економска програма, која на земјите од ЕУ ќе им помогне да се опорават од кризата предизвикана од пандемијата на коронавирус, и според Меркел, во итерес на земјата е тоа и да го направи. 
„Германија имаше ниска стапка на задолженост и во оваа вонредна ситуација може да си дозволи поголеми задолжувања“, изјави канцеларката во интервју кое вчера го објавија шест европски весници, додавајќи: „Тоа што е добро за Европа, е добро и за нас.“
Меркел и францускиот претседател Емануел Макрон во изминатиот месец предложија санирачки пакет од 500 милијарди евра, кој би се финансирал преку заеднички кредити со членките на ЕУ, без оглед на долготрајниот отпор на Германија против заеднички долгови. 
Меркел во интервјуто изјави дека пандемијата на коронавирус ја конфронтираше ЕУ со „предизвици од невидени размери“ и Германија „треба да мисли не само на себе, туку да биде спремна и на вонреден акт на солидарност.“
Земјите кои се посебно погодени од пандемијата би требало да добијат најмногу помош од санирачкиот фонд, изјави Меркел, споменувајќи ги Италија и Шпанија како примери. 

Повеќе:

ЕУ: Покерот за корона милијардите одложен за јули

„Make Europe great again“

Коронавирус: Шенген се враќа во живот

„Штедливите“ контра Меркел и Макрон

На прашањето дали во игра е опстанокот на ЕУ, Меркел истакна дека сите држави членки веројатно „имаат силен интерес за работите кои нѐ поврзуваат.“ Корона-фондот за обнова не е волшебен лек за решавање на сите проблеми на Европа, призна Меркел, вклучувајќи ги националистичките и популистички тенденции во одредени земји, но „ако го немаме, нашите проблеми ќе се влошат.“

„За Европа да може да преживее, мора да преживее нејзината економија“, рече Меркел, укажувајќи на закани за демократијата предизвикани од проблеми како невработеноста. 
Интервјуто на Меркел е дадено кратко пред Германија од 1 јули да го преземе ротирачкото претседатвање со ЕУ. 
Интервјуто е дадено за „Зиддојче цајтунг“ од Германија, британски „Гардијан“, „Ле Монд“ од Франција, италијанскиот „Ла Стампа“, „Ла Вангардија“ од Шпанија и „Политика“ од Полска.

Германската канцеларка пак ги предупреди граѓаните во Германија од лекомислено однесување во пандемијата на коронавирус, која не е завршена. „Опасноста која произлегува од вирусот и натаму е сериозна", изјави Меркел во нејзината редовна саботна видео-порака. Меркел го повторува нејзиниот апел од март: „Сфатете ја ситуацијата сериозно, зашто таа е сериозна".

„Опасноста лесно се заборава, бидејќи Германија досега релативно лесно поминува низ корона-кризата, но тоа не значи дека сме заштитени, дека опасноста е остранета. Тоа го покажува актуелно и избувнувањето на регионални жаришта", истакна Меркел.

За сузбивањето на пандемијата, покрај политиката и во иднина се одговорни и сите граѓани. „Сите ние мораме да продолжиме да ги исполнуваме заедничките обврски, секој од нас треба да ја земе својата судбина во свои раце, придржувајќи се на правилата: држење минимална физичка дистанца, носење заштитна маска во јавни простории и миење на рацете", порача Меркел.