Нов силен земјотрес во Хрватска

Според сеизмолозите, земјотресот кој денеска повторно го погоди хрватскиот централен регион има сила од 6,4 степени според Рихтер. Оштетени се бројни згради во Петриња, Сисак и други места. Градоначалникот на Петриње Даринко Думбовиќ во изјава за ХТВ соопшти дека загинало едно девојче, а има повеќе повредени лица. Потресот бил силно почувствуван и во Загреб, каде некои згради се повторно оштетени. Бројни висококатници се евакуирани. Земјотресот е почувствуван и во соседните земји, посебно во Босна и Херцеговина и Словенија. Австриската централна служба за метеорологија и геодинамика во Виена соопшти за потрес од 6,1 степен, почувствуван во повеќе австриски региони, претежно во Корушка но и во главниот град Виена.

-повеќе на темата: Три земјотреси во Хрватска

И во одделни области на Италија е регистрирано тресење на земјиштето, италијанската служба за цивилна заштита е во контакт со повеќе региони. На Твитер бројни италијански корисници пишуваат дека го почувствувале земјотресот.

Ова е втор земјотрес во последните 30 часа во Хрватска. Вчера во истата област беа регистрирани потреси на земјиштето од 5,2 и 5 степени според Рихтер.

Во март земјотрес од 5,4 степени предизвика големи штети, имаше една човечка жртва и бројни повредени лица.