Рецепт за успех на македонското вино

Винаријата Биндерер во Германија со децении е тесно поврзана со Македонија. Лоцирана во близина на градот Франкфурт, во оваа винарска визба со години се полнат македонски вина кои оттаму го наоѓаат своето место на полиците на супермаркетите во Германија и пошироко во Европа.

Сопственикот Петер Биндерер во разговор за Дојче Веле раскажува за врската со Македонија и македонското вино за кое вели дека полека но сигурно станува неизбежен дел од германското секојдневие:

„Мојот татко кој ја основаше нашата винарска визба беше првиот кој започна да увезува вино од Македонија. Македонското вино е неизбежен дел од историјата на нашата фирма и слободно можам да кажам дека на него гледаме со љубов. Вината од Македонија не ги продаваме само во Германија, туку и во други земји од ЕУ. Македонското црвено вино е на петто место по продажба во Германија и има пазарен удел од 13 до 15% од сите увезени вина, вклучително и германските“, вели Биндерер.

Чекор по чекор до успех

Во услови на огромна конкуренција пред се од традиционалните пазари како Франција, Шпанија и Италија, Македонија тешко се пробива на западните пазари пред се со флаширани производи. Биндерер советува да се биде оптимист и трпелив:

„Голем предизвик е да се произведе квалитет и тоа постојан. Потребно е трпение и да се оди чекор по чекор. Нашиот партнер во Македонија со кој соработуваме тоа го прави со години. Најдобрата пропаганда е она што се наоѓа во шишето, а тоа е квалитетот на кој треба силно да се работи. Македонија не е земја која потрошувачите веднаш ги асоцира на вино. Затоа мислам дека се` уште е многу тешко флашираното вино да се пробие во земји како Германија и Англија и слично“, вели Биндерер.

Оптимизам и работа

Во услови на огромна конкуренција, германскиот производител вели дека е многу тешко да се прогнозира како ќе се развива овој бизнис во иднина. Посебно кога станува збор за земји како Македонија:

„Мислам дека иднината е во рацете на секоја земја поединечно. На пазарот на вино постојано се случуваат промени. Кога ќе помислите колку вина се произведуваат во светот и по кои цени тие се продаваат во нашите супермаркети, мислам дека е невозможно да се прогнозира што ќе се случува наредните години. Но мислам дека она што е во рацете на земјите, е прво да се остане оптимист, силно да се работи на квалитетот, уште на самите лозови насади. Ако не насадите вистински и квалитетни лози, тогаш не можете да очекувате дека ќе произведете добро вино. Потоа технологијата во винарската визба и секако луѓето кои мора да бидат посветени со својата работа да произведат добар производ. Секоја земја која го има ова може да смета на успех“, вели Биндерер.

Според податоците, годишно во Германија се извезуваат околу 20 милиони литри македонско наливно вино. Повеќе од една третина од извозот, завршува токму во винаријата Биндерер, од каде во шишиња како македонско вино се продава на полиците на синџирот супермаркети Алди, Едека и други.

Автор: Костадин Делимитов

Редактор: Симе Недевски