Прифатена кауција од 10 милиони евра за Мијалков

Поранешниот прв човек на тајната служба, Сашо Мијалков со понудена гаранција од 10 милиони евра наскоро би можел да се брани од слобода.  Обвинителството за гонење на организиран криминал и корупција ја прифати понудената парична гаранција на поранешниот директор на Управата за безбедност и контраразузнавање кој е во притвор. Мијалков е во истражниот затвор Скопје од 23 февруари, откако полицијата трагаше по него поради сомнеж за бегство.  

-повеќе на темата: Кој може да биде задоволен од пресудата за Мијалков

„Обвинителството ценејќи ги околностите и имајќи ги предвид наводите во предлогот и дополненијата за укинување на мерката притвор и нејзина замена со мерка гаранција, ценеше дека висината на понудената гаранција во доставените предлози во вкупен износ од 10.871.170,00 евра е прифатлива за обвинителството за обезбедување на присуство на обвинетиот до правосилноста на пресудата“, е ставот на Обвинителството за гонење на организиран криминал и корупција.
Мијалков издржува мерка притвор за случајот„Трезор“, каде што е неправосилно осуден на 8 години затвор. За него и неправосилна пресуда од 12 години затвор за случајот „Таргет-Тврдина“, а во тек се и судски процеси за „Титаник 2“ и за „Тортура“, кој е пред донесување пресуда. Обвинителството на 12 мај годинава,  поднесе обвинение и за случајот „Плацеви на Водно“, каде и Мијалков е меѓу осомничените.