Солидарност со Египет

По нападите врз две коптски цркви, Египет доживува впечатлив бран на солидарност. Муслиманските граѓани им изразуваат сочувство на припадниците на христијанското малцинство, на Твитер и на Фејсбук се колнат во единството на земјата и донираат крв за христијанските жртви на теророт. Пораката е утешна исто колку што е јасна: Ние сите сме Египќани! Нема да дозволиме да бидеме разединети од провокации и насилство!

Овој Египет ја заслужува и нашата солидарност. Зашто подобар одговор на теророт Египќаните не можеа да дадат. Калкулацијата на терористите цели токму кон тоа, да направи раздор меѓу муслиманите и христијаните и египетското општество да го дестабилизира одвнатре.

Затоа солидарноста, која египетските христијани по двата напади ја доживуваат сега од страна на муслиманите, е многу важен сигнал во насока на сите активисти и симпатизери на „Исламската држава“ (ИС), која со одвратна гордост ја презеде одговорноста за двата напад. Тука се позиционираат муслимани кои јасно велат: Теророт против оние со друга религија нема ништо, ама баш ништо заедничко со нашата вера!

Ал-Сиси мора да постапува со претпазливост

Сега на потег е политиката. Претседателот Абделфатах Ал-Сиси прогласи тримесечна вонредна состојба во земјата и најави засилени мерки за безбедност. На египетските христијани итно им е потребна оваа заштита. Ним не им преостанува никаков друг избор, освен грижата за нивната сопствена безбедност да ѝ ја доверат на владата и на најдобар начин да соработуваат со неа- дури и ако со тоа уште повеќе се најдат во визирот на радикалните исламисти, кои во нив гледаат вазали на омразениот режим на Ал-Сиси.

Но владата досега не успеваше да ги заштити христијаните и да го запре убивањето и протерувањето на Коптите од полуостровот Синај. Тука Ал-Сиси мора да стори повеќе, истотака и со воени средства. Тој меѓутоа притоа мора да постапува со претпазливост. Уште поостро постапување против критичарите на владата и опозиционерите и посебно натамошни повреди на човековите права би биле фатални. Тие би можеле да го поделат општеството и да ја направат ситуацијата уште поопасна за христијаните.