Страв од четврти бран на коронавирусот во Германија

Сѐ би можело да биде убаво. Стигна летото, почнуваат распусти и одмори, бројот на новозаразени со коронавирус се ближи кон нула. Но, тука е т.н. Делта мутација на вирусот, на која отпаѓаат веќе речиси половина од новите инфекции во земјата. Оној кој ќе допатува во Германија од земји во кои доминира оваа варијанта, мора 14 дена да помине во карантин, па макар и да е вакциниран.

Дури 62% од Германците стравуваат од нов бран ковид, што е 12 % повеќе отколку минатото лето. Во превод, сега многу помалку луѓе веруваат дека короната е победена. Тоа произлегува од репрезентативната анкета Дојчландтренд, која редовно ја објавува јавниот сервис АРД.

Загрижени родители

Родителите на школски деца во огромен процент (89%) стравуваат дека изминатите месеци, кога училиштата работеа „на лажичка“ и наизменично се вршеше онлајн со настава со физичко присуство, ќе остават последици врз развојот на децата. Во општата популација тоа мислење го имаат 79% од луѓето.

Затоа голем број од граѓаните бараат пред идната школска година да бидат спроведени подготовки. На пример инсталирање филтери за воздух во училиците (тоа го поддржуваат 84 % луѓе) или задржување на праксата учениците, доколку не се вакцинирани, двапати неделно во училиштата да се тестираат со брзи тестови (76%). Понудата за поделба на одделенијата и одржување наизменична настава преку интернет и во училница ја поддржуваат 68 % луѓе.

Од друга страна, граѓаните не одобруваат обврска децата на часовите непрекинато да носат маска. Само 37% се за тоа, како и само 27% од родителите на школски деца.

-повеќе:

Германија: Повторно се бараат сѐ повеќе работници

Пандемија: Онлајн наставата како летен распуст

Лето, сонце - четврти бран на коронавирусот?

Корона: Расте критиката за кризниот менаџмент на германската влада

Без оглед на стравот од четврт бран коронавирус, економското расположение се поправи. Првпат од избивањето на пандемијата, мнозинство луѓе (60%) оценува дека ситуацијата во економијата е добра или многу добра. За волја на вистината, постојат големи разлики во одговорите во зависност од тоа која политичка партија ја преферираат испитаниците.

Демохристијаните солидно пред Зелените

Кога сме веќе кај партиите. За Унијата (ЦДУ/ЦСУ) би гласале 28% граѓани, исто како и во минатомесечната анкета. Зелените, кои пролетоска беа на прво место, сега можат да сметаат на 20%, Социјалдемократите се трети со 15%, а следат Алтернатива за Германија (АфД) и Либералите (ФДП) со по 11%, па Левица со 7%.

Работите се менуваат кога луѓето ги прашате за канцеларски кандидат. Да можат директно да гласаат за кандидатите, дури 29% би го избрале социјалдемократот Олаф Шолц. Следат шефот на ЦДУ Армин Лашет со 28% и Аналена Бербок од Зелените со 18%.

-повеќе:

Германија пред избори: Лашет и ЦДУ ги претркаа Зелените

На одлуката за изборот влијае и тоа што граѓаните чувствуваат потреба од темелни промени во земјата. Тоа го посакуваат 34% испитаници, што е дури 15% повеќе отколку пред изборите во 2017 година. Но и денес мнозинството (57%) заговара само помали корекции на курсот.

Очекувано, најмногу заговорници за радикални промени има меѓу гласачите на АфД (58%), Левица (53%) и Зелените (46%). Кај ЦДУ/ЦСУ и СПД, кои ја сочинуваат владејачката коалиција, по 70% луѓе мислат дека се потребни само мали измени. Интересно, дури 75% приврзеници на опозициските Либерали заговараат само мали корекции.

Колку наближува пензионирањето на канцеларката Ангела Меркел, толку расте задоволството од нејзината работа. Овој месец 69% луѓе се задоволни од канцеларката, што се 6% повеќе отколку пред еден месец.