Тајната на „умот“ на Европската комисија

Жослин Колонвал е Белгијка и работи како архиварка во Европската комисија. За нејзината работа таа зборува со воодушевување. Жослин точно знае што е потребно за да се биде добар архивар. Имено, денеска не е доволно само да им се дозволи пристап на луѓето до одредени документи: „Треба да им се објасни на луѓето како и каде се бара нешто во архивата и зошто некои работи можат да се најадат само овде, а не и на друго место“, вели Жослин. Освен тоа, интернетот многу ја прошири понудата на информации, но тој истовремено ги „гуши“ информациите, објаснува таа.

Жослин заедно со нејзината колешка од исторскиот архив на Европската комисија ги пречекува научниците во една читална. Тоа е место за сите оние, кои сакаат да погледнат во старите историски документи на Европската комисија. А, такви има многу, како на пример научници, новинари, претприемачи и советници во Европска унија. Во една поголема соседна просторија двајца соработници прават селекција на старите документи. Потоа од нив се прават копии на микрофилмови, а оригиналните документи се носат во два магацини во Брисел и Луксембург, каде се складираат.

Т.н. „ум“ на Европската комисија е многу голем

Сите ормари со папки во двата магацини достигнуваат вкупна должина од преку 130 километри. За архивата на Комисијата се интересираат научници од целиот свет. Жослин Колонвал се обидува да одговори на сите телефонски прашања, што ќе пристигнат до неа. Тоа за неа значи да најде соодветен соговорник, кој би можел да помогне при барањето на некој документ. Имено, Европската унија однадвор е многу непрегледна. Кај Жослин Колонвал пристигаат барања и од други архивски служби, како на пример од Советот на Европа во Стразбур, кој не е дел од европските институции.

На Жослин не и е тешко на заинтересираните луѓе постојано да им ја објаснува стуктурата на Европската унија. Таа тоа го прави на француски, нејзиниот мајчин јазик, или пак, на англиски или холандски. Валонката од Белгија студирала историја и е горда Европејка. Службено таа се занимава со последиците од Првата светска војна и поствоениот период: „Во тоа време се' било можно. Дури и најлошото било можно“, вели таа замислено. Способноста на европските земји, заедно да го поттикнуваат големиот проект на помирување ја фасцинира Жослин.

И јавноста може да ѕирне во документите на Комисијата

Важните договори на ЕУ и сите нејзини институции се чуваат во главното седиште на архивот во Фиренца. Во историскиот архив во Брисел се чуваат документите на Комисијата што не се толку важни во политичкото секојдневие. Документите постари од 30 години се ставаат на располагање на јавноста. Она што Жослин Колонвал го цени во нејзината работа е големата содржинска разновидност. Таа работата ја споредува со европскиот процес на интеграција. На ЕУ и е потребна архивата вели таа: „Јас не доаѓам секое утро на работа со мислата: денес ќе ја придвижам Европа нанапред, но верувам во проектот. На Институцијата мора да и биде јасно, дека во иднина при некои одлучувачки процеси таа живее од нејзинато минато. Понекогаш мора да погледне наназад.“

Жослин порадо гледа во иднината. Таа започна со модерно преуредување на историскиот архив. Имено, првите важни говори на поранешниот претседател на Европската комисија Жак Делор се достапни за јавноста и тоа не во вид на микрофилм, туку како ПДФ- документ на интернет.

Автор: Нина Хазе/ Бисера Огњановска Митров

Редактор: Александра Трајковска