Трае потрагата по преживеани во театарот во Мариупол
17 март 2022
Еден ден по воздушниот напад врз театарот во Мариупол, се уште нема точна информација за бројот на жртви и повредени. Стотици цивили биле засолнати во зградата во центарот на разурнатиот град, откако нивните домови биле уништени во руските напади. Градот е речиси целосно отсечен од комуникациите со светот и не е познато дали некој успеал да излезе од урнатините.
„Се надеваме и сметаме дека некои луѓе кои беа во скривницата под театарот преживеале“, вели Петро Андрушченко, советник во канцеларијата на градоначалникот на Мариупол. Тој вели дека зградата има релативно модерно засолниште од бомби кое би требало да ги издржи ударите.
Други претставници претходно рекоа дека некои луѓе успеале да излезат. Украинската народна правобранителка Људмила Денисова соопшти дека скривницата издржала.
50 бомби дневно паѓаат врз Мариупол
Сателитски снимки направени во понеделникот покажуваат големи бели букви пред двата влеза на театарот со порака: „ДЕЦА“ на украински, со цел да им се укаже на авионите да не бомбардираат.
Руската армија тврди дека не извршила никакви напади врз Мариупол во текот на целиот ден во средата.
Според податоците, околу 80% од сите станбени објекти во Мариупол се уништени во непрекинатото руско бомбардирање кое трае веќе три недели. Од нив, околу 30% не можат да се обноват, велат локалните власти.
„Во просек паѓаат меѓу 50 и 100 бомби врз градот секој ден. Уништувањето е огромно“, соопшти градскиот совет на Телеграм. Информацијата не можеше да биде независно потврдена. Досега околу 30,000 цивили успеале да го напуштат градот кој пред војната имаше 400,000 жители.
Очајна е состојбата и во градот Чернихив на северот на земјата, каде во последните 24 часа биле убиени најмалку 53 цивили во руското бомбардирање. Украинските спасувачки служби ги откриле телата на мајка, татко и нивните три деца, од кои две тригодишни близнаци, под урнатините на хостел кој бил гранатиран од руските сили.