Турција ги налути Американците

Американската влада е лута поради објавувањето интерни информации за ангажманот на САД во Сирија од страна на државни медиуми во Турција. Пренесување „чувствителни воени информации“ ги изложува меѓународните трупи во Сирија на „непотребен ризик“ и ја загрозува борбата против џихадистичката милиција Исламска држава, изјави портпаролот на Пентагон, Адријан Ренкин-Геловеј. САД веќе ѝ ја пренесле на турската влада својата загриженост.

САД не можат да разјаснат кој ѝ ги дал информациите на турската агенција Анадолу, но „ние би биле многу загрижени доколку претставници на некој од сојузниците во НАТО би ги довеле целно во опасност нашите војници, со тоа што би објавиле чувствителни информации“, изјави Ерик Пеон, исто така портпарол на американското Министерството за одбрана.

Анадолу во вторникот наведе десет американски бази во северна Сирија, меѓу кои и две места за полетување и слетување на авиони. За дел од базите е дури наведен и точен број на таму стационираните американски и француски војници.

САД се долго во судир со својот партнер во НАТО - Турција. Американскиот претседател Доналд Трамп во борбата против ИД ѝ дава поддршка на сириската курдска милиција ЈПГ, меѓу другото и со оружје. Турција, пак, смета дека ЈПГ е продолжена рака на забранетата Курдска работничка партија (ПКК).

Освен тоа, Американците одбиваат да го испорачаат свештеникот Фетула Ѓулен, кој живее во егзил во САД, а кој од страна на турскиот претседател Ердоган се смета за човек кој стои зад пропаднатиот обид за пуч во 2016 година. Турција, освен тоа, е лута поради тоа што САД имаат издадено налози за апсење против неколкумина турски телохранители. Тие се обвинети за примена на насилство врз демонстранти за време на посетата на Ердоган на САД на средината од мај годинава.