Турција им го возврати царинскиот удар на САД

Турција ги удвои царините за одделни американски производи, како на пример патнички автомобили, алкохол и цигари, како одговор на, како што се вели, американските напади врз турската економија.  Одлуката е објавена во Службен весник на Турција.

Одредбата за зголемување на царините ја потпиша турскиот претседател Реџеп Таип Ердоган и таа предвидува царините да бидат двојно зголемени, така што за патничките возила ќе изнесуваат 120 насто, за алкохолните пијалоци 140, а за листовите тутун 60 отсто. Меѓу производите на кои се воведува дополнителна царина се и оризот, јагленот, товарните возила и козметиката.

„Увозните царини се зголемени за одделни производи, по принцип на реципроцитет, а како одговор на намерните напади на американската администрација на нашата економија“, напиша потпретседателот на Турција, Фуат Октај, на Твитер.

Како што се наведува, влошувањето на односите со САД предизвикаа рекорден пад на турската лира, која загуби над 40 насто од својата вредност во однос на доларот годинава.

Овој потег следеше среде тензиите меѓу двете членки на НАТО сојузот поради свештеникот Ендру Бренсон кој е уапсен во Анкара поради наводните врски со терористички групи, но и поради други дипломатски проблеми.

Минатиот петок, амерканскиот претседател Доналд Трамп изјави дека одобрил удвојување на тарифите на увоз на алуминиум и челик од Турција.