Харадинај за ДВ: „Ако Србија не е подготвена, ќе причекаме“

ДВ: Господине Харадинај, самитот во Берлин е одржан, пред нас е оној во Париз. Што може да се очекува до тој датум, но и на самиот самит?

Рамуш Харадинај: Мислам дека е многу важно што се појави нова енергија кога станува збор за ситуацијата помеѓу Косово и Србија и можниот договор за признавање. Исто така, важно е што во Берлин се разјасни дека договорот за признавање не може да се постигне со дискусии за територии и граници, затоа што тоа е враќање во минатото, трагичното минато. Сепак, ако сега постои политичка волја, можно е да се напредува до договор помеѓу Косово и Србија за признавање. Сега во Париз најверојатно ќе дискутираме за елементи на тој можен договор.

Но каков можен договор кога претседателот на Србија вели дека „додека е тој на функција, нема да има признавање на Косово во овие граници“, а истовремено и натаму се во сила косовските такси?

Поминати се веќе 20 години од војната и трагичните настани. Деновиве секој втор ден е годишнина од некој масакр. Но ние, наспроти тоа, како и наспроти ситуацијата во врска со исчезнатите кои сѐ уште не се вратени да кажеме од Батајница или од други места во Србија, не го условуваме дијалогот. Ние одиме на разговори со претседателот Вучиќ и официјалните претставници на Србија и сметаме дека е важно да не го условуваме дијалогот. Во текот на дијалогот може да се разговара за сѐ, но повторувам - минаа веќе 20 години... Ние сме подготвени за договор за признавање и тоа би бил почеток на нашите односи како соседи. А, ако Србија не е подготвена, ние ќе причекаме.

Како во сето тоа ја оценувате улогата на Германија?

Многу е важно што Германија беше многу јасна, што многу јасно го изнесе својот став, а тоа е да се зачуваат мирот и стабилноста во регионот. Приказните за територии, односно за размена на територии и граници, би можеле да нѐ вратат назад, во војни, во она што еднаш веќе го поминавме. Ставот на Германија е порака за нас да го чуваме мирот, а по малку и порака до ЕУ да го зачува она што го инвестираше во мирот и стабилноста. И, тоа не е само порака до ЕУ, туку и до НАТО, Америка и сите кои вложија веќе две децении за воспоставување на стабилност, мир и на односите во регионот.

Ваш партнер во разговорите е пред сѐ претседателот Вучиќ. Има ли можеби некој на политичката сцена во Србија со кого повеќе би сакале да преговарате?

Немам таков избор, тоа го одлучува српскиот народ и јас ја почитувам одлуката на српскиот народ. Но се надевам дека оној кој го претставува срскиот народ ќе има храброст да оди напред, а не само да ги чува сопствените интереси. Некој мора да ја имаат таа храброст и да ја признае реалноста. Ние постоиме, Косово постои, тоа е независна и суверена држава. И за Србија е исто така важно да го сфати тоа - што побрзо, тоа подобро.