Шверцот со мигрантите цути на Балканот

Мохамад Џама останува без здив додека раскажува за своето тајно патување од Грција во Македонија: десетдневна „авантура“ низ планините дополнета со ограбување од локалната „мафија“ и плаќање мито на полицијата.
Иако т.н. Балканска рута е официјално затворена за мигрантите, стотици сѐ уште наоѓаат пат низ неа секој ден, без разлика дали самостојно или со помош на шверцерите.

„Можеби денеска или утре ќе одам во Србија, пеш. Не се плашам од полицијата или мафијата, сакам да стигнам до Германија“, вели 20-годишниот Џома, студент по право од Сирија.

Тој и неговите четворица сопатници - млади луѓе од Сирија и од Ирак, одмораат неколку дена во бегалскиот центар Табановце пред да продолжат на север кон Србија.

Раскажуваат за интензивните пазарења и договори во кампот меѓу бегалците и криумчарите кои доаѓаат во посета навечер.

„Тука е вистински пазар“, се шегува Џома.

„Сега знаеме кој е сиромашен“

Откако во март беше затворена Балканската рута, околу 1.500 луѓе останаа заглавени на Табановце. Денес се останати само уште неколку стотици.
Пред затворањето на границата „не знаевме кој е сиромашен, а кој богат“, вели Дритон Малиќи од невладината Легис. Но оние што останаа очигледно се сиромашни „затоа што оние кои имаат пари успеаја да заминат“, вели Малиќи.

„Иако Балканската рута е затворена, секој ден доаѓаат нови бегалци, но сите знаат дека тоа го прават преку шверцерски канали“, вели Малиќи.

Бремената 17-годишна Сиријка, Нур Монаџед, која е заглавена во Табановце, вели дека ѝ се потребни 200 евра за да биде префрлена до Белград.
„Доколку имате пари не е проблем, но јас немам“, вели таа.

Шверцерските банди во Европа успеале да заработат 6 милијарди долари во 2015 година, се наведува во заедничкиот извештај на Интерпол и Еуропол објавен во вторникот. Повеќе од 90 проценти од мигранти користат шверцери на дел од своето патување во Европа, плаќајќи во просек меѓу 3 и 6 илјади евра.

Многумина од нив завршуваат како бело робје за да си го исплатат долгот.

Џома и неговите пријатели на крајот успеаја да стигнат во Белград со воз, откако добиле совет од македонските полицајци каде да ја минат границата. Планираат да заминат кон Унгарија, откако шверцер им понудил да ги пренесе преку границата за 800 евра по човек.