„Шлаканица“ за Орбан во унгарскиот парламент

Унгарскиот парламент денеска не го прифати амандманот на Уставот на премиерот Виктор Орбан против бегалските квоти, односно амандман со кој на бегалците би им се забранило да се доселат во Унгарија.  Орбан не ги доби неопходните две третини од гласовите во парламентот, односно за прифаќање на амандманот му недостасуваа само два гласа. За амандманот гласаа 131 пратеник, од 199, а за да биде усвоен неопходни беа 133 гласа.

Орбан претходно изјави дека усвојувањето на амандманот е неопходно за да се потврди резултатот на референдумот за бегалските квоти, одржан на 2. октомври. На референдумот, иако гласаа помалку од половина од граѓаните со право на глас во Унгарија, повеќе од 3 милиони Унгарци гласаа против бегалските квоти на ЕУ.

Тоа е прв пат по 2010. година унгарскиот парламент да гласа против премиерска одлука. Аналитичарот Золтан Цегледи оцени дека гласањето во парламентот претставува „пораз на политиката на моќ“  и оти Орбан го доведува во „тешка позиција да објаснува зошто не е способен да постигне што било“.

Минатата година ЕУ усвои одлука за обврзувачки квоти за прифаќање мигранти. Унгарскиот премиер Виктор Орбан повеќе пати истакна оти таа одлука е „нелегална, неразумна и нефер“ и оти Брисел со тоа ги преминал своите овластувања кога ја одобрил таа распределба и покрај противењето на некои земји, главно од источна Европа.