Штрајк: „ Луфтханза“ ги откажува речиси сите летови

Како што најави синоќа германската воздухопловна компанија „Луфтханза“, утре ќе бидат откажани речиси сите летови на кратките и средните релации поради штрајкот на персоналот на земјата и на екипажите на авионите. Погодени се аеродромите во Франкфурт, Хамбург, Минхен, Штутгарт, Хановер, Диселдорф и Келн.

„Поради најавениот предупредувачки штрајк во понеделник 22-ри април, речиси сите летови на Луфтханза во Германија и Европа ќе бидат откажани. Вкупно, од 1.650 летови на кратките релации се предвидува дека ќе има дваесетина“, се наведува во соопштението на компанијата.

Од „Луфтханза“ предупредуваат дека и некои интерконтинентални летови ќе бидат погодени од штрајкот. Од меѓународниот аеродром во Франкфурт ќе бидат извршени само 6 од 50 интерконтинентални летови, од Минхен три од 17, додека од Диселдорф ќе бидат извршени три интерконтинентални лета, колку што и се предвидени.

Синдикатот на вработените во секторот на услугите Верди побара зголемување на платите од 5,2 отсто во следните 12 месеци за околу 33 илјади вработени на „Луфтханза“ во Германија, како и гаранции за работните места. Според Верди, „Луфтханза“ понудила да ги зголеми платите на вработените за 0,4 до 0,6 проценти. Од страна на „Луфтханза“, пак, се тврди дека понудата е од 1,7 до 2,3 проценти. Авиокомпанијата укажува - планираниот штрајк ќе предизвика веројатно двоцифрена милионска штета. Компанијата моментно спроведува програма за штедење и кратење. Концернот меѓу другото укинува 3.500 работни места во администрацијата за да продонесе во предвидената заштеда 1,5 милијарди евра.

Инаку, преговорите за платите со синдикатот Верди се водат уште од февруари. Следната рунда разговори е предвидена за 29 и 30 април.