ايټاليا کې د چټکو خوړو ۲۰۰۰ کلنه لرغونې غرفه وموندل شوه
۱۳۹۹ دی ۷, یکشنبه
د پارکو ارکېولوګيکو په نوم موزيم دغه رستورانت د پومپئي په تاريخي ښار کې يو تر ټولو لرغونو خوړنځای بللی دی. د موزيم يوه استازي ويلي دي چې «د دغسې يوه تېرموپوليوم د څېړنې امکانات بېلابېل دي ځکه چې په لومړي ځل دغه ډول يوه ساحه په بشپړه توګه راوسپړل شوه.» تېرموپوليوم په لاتيني يعنې د روميانو په ژبه کې رستورانت ته وايي.
د رستورانت د خرڅلاو د مېز يوه برخه يو کال پخوا لا قسماً راسپړل شوې وه چې کارپوهانو يې شاوخوا د خوراکونو او د انسانانو او حيواناتو د هډوکو پاتې شوني تر خاورو لاندې موندلي او راويستلي دي. په پومپئي کې مېشت کسان تقريبا دوه زره کاله پخوا د يوه اورغورځونکي غره د اورونو قربانيان ګرځېدلي ول. د رستورانت په شاوخوا کې موندل شوي هډوکي د لومړنيو معلوماتو له مخې د يوه تقريبا ۵۰ کلن سړي دي چې ښايي د ناورين پر مهال په يوه کټ باندې پروت وو. د نورو پاتې شونو څېړنه لا دوام لري.
خوراکي مواد په ډبرينو مېزونو کې ساتل کېدل
په زيړ رنګ او انځورونو ښايسته کړل شوی مېز د حيواناتو، د اوبو د يوې ښاپېرۍ او يوه سمندري آس په انځورونو سينګار شوی دی. ورباندې رسم شوې هيلۍ او يو چرګ ښايي هغه حيوانات وي چې غوښې يې ښايي دلته پلورل کېدلې. په دغه ډبرين مېز کې داسې سوري هم کيندل شوي دي چې د څېړونکو په اند ښايي خوراکي مواد پکې ځای پر ځای شوي ول. داسې هم ښکاري چې يوه ټوکي يا مسخره چي دغه مېز ته لاس ورغځولی وو. د يوه انځور تر څنګ په لاتيني ژبه ټکي په ټکي ليکل شوي دي: «نيکياس، بې شرمه غولنه.» نيکياس ښايي د دغه دوکان د څښتن نوم وي.
د پومپئي ښار د اورونو تر فوارو لاندې ښخ شو
د پومپئي ښار د وېسوف نومي غره تر اورغوځونې وروسته په اورونو، ايرو او لاوا يعنې د ويلي شويو تيږو په فوارو کې غرق او تباه شو. دغه ښار په ۱۸مه پېړۍ کې بېرته کشف شو چې د هغه وخت راهيسې وار به وار نوي معلومات په لاس راځي. دغه لرغونې سيمه په ايټاليا کې د سيلانيانو يوه تر ټولو محبوبه منطقه ده.
nob/fab/ن ص/ا ا
پر ورته موضوع زموږ له آرشيف څخه يو مطلب (30.08.2020):