بريتانيا د څو افغان خبریالانو پر انتقال له سره فکر کوي

د رويټرز خبري آژانس د رپوټ پر اساس، دغه افغان خبریالان چې وايي په افغانستان کې ېې ژوند د طالب واکمنانو له خوا په خطر کې دی، د دوشنبې په ورځ ېې خپله حقوقي دعوا وګټله ده.

د دغو خبریالانو مدافع وکیالانو په دسمبر میاشت کې د لندن عالي محکمې (های کورټ) ته ويلي وو چې حکومت د ۲۰۲۱م کال په اګست کې په افغانستان کې د طالبانو تر بيا واکمنېدو وروسته د دغو خبریالانو په نه رایستلو سره د هغوی حق ته په درناوي کې خیانت کړی دی.

بې سرحده خبریالانو د افغان ژورنالیستان د ژر منلو غوښتنه کړې

هغه وخت د حکومت استازو استدلال کړی وو چې له دغو اتو خبریالانو څخه هيڅ يو ېې د افغانانو د تخلېې پروګرام (ARAP) پر شرایطو برابر نه دي.

په پام کې ده چې اوس به بریتانیا ته د دغو اتو افغان خبریالانو پر انتقال له سره تصمیم نيول کيږي، څرنګه چې د دوی وکیلان وايي دغه کار به د درو اوونیو په جریان کې ترسره شي.

د بي بي سي پښتو ويب پاڼه په دې هکله ليکي چې د (لندن د عالی محکمې قاضي د دوي د غوښتنې رديدل «تېروتنه» بللې وه او ويلي ېې وو چې دولت له ډيرو محدودو معيارونو ګټه اخیستې چې دا پایله ترلاسه کړي دوی د بریتانيا حکومت له پاره کار نه دی کړی.)

په افغانستان کي د رسنیو اندېښمن وضعیت او ناڅرګند برخلیک

سرچېنه د دغو اتو خبریالانو د وکیلانو له قوله زیاتوي چې په افغانستان کې «خبریالان ربړول شوي او په مرګ ګواښل شوي دي.»

دوی وايي دغه افغان خبریالان په افغانستان کې د بریتانيا پوځ پورې اړوندو دفترونو او د بریتانیا حکومت له لوري په تمويليدوکو پروژو کې هم کار کړی دی. وکیلان زياتوي چې د خبريالانو په کارونو کې ځېنې داسې موارد هم شامل دي چې هغوی پکې د طالبانو خلاف غږيدلي او فساد او ناوړه استفادې ېې په ډاګه کړي چې دا د طالبانو له خوا هغوی ته پر ګڼو ګواښونو او حملو منتج شوي دي.

په افغانستان کي دطالبانوله خوا دخبریالانودنیولواو وهلو ټکولود پیښوزیاتوالی

یوې وکیلې ارین الکاک، چې د دغو افغان خبریالانو استازيتوب کوي، وویل چې موکلان ېې «له څه باندې ۱۸ میاشتو راهیسې په ډار کې ژوند کوي.»

د بریتانيا دفاع وزارت یوه وياند وويل چې دغه وزارت د کومې مشخصې حقوقي دوسېې په هکله څرګندونې نه کوي، اما په راتلونکې کې به په دې تړاو د احتمالي اقداماتو ارزونه وکړي.

له سلو ډیرو خبریالانو له نړیوالې ټولنې څخه د ملاتړ غوښتنه وکړه

بي بي سي وايي د بریتانيا دفاع وزارت ويلي دي چې دغه وزارت «په نه ستړي کيدونکې توګه د افغان وګړو د خوندي تخلېې له پاره خپلې هلې ځلې کوي.»

د سرچېنې په حواله، دغه وزارت اټکل کړی چې شاوخوا ۳۰۰ داسې افغانان د هغوی له کورنیو سره شته چې په بریتانيا کې ېې د ميشتيدا شرایط پوري کړي او دولت هڅه کوي چې هغوی بريتانيا ته راوباسي.

(Reuters,bbc)mks/nz

له آرشیف څخه یو انځوریز البوم: