تر ټولو لوی د مسلمانانو ټاټوبی به وګرځي کوم هيواد؟

دمګړی اندونيزيا تقريبا ۲۰۴ مليونه، پاکستان ۱۷۸ مليونه، هند ۱۷۲ مليونه، بنګله دېش ۱۴۵ مليونه او نايجيريا ۷۵ مليونه، ايران ۷۴ مليونه، ترکيه ۷۴ مليونه، مصر ۷۳ مليونه، الجزاير ۳۴ مليونه، مراکش ۳۲ مليونه، عراق ۳۱ مليونه، سودان ۳۰ مليونه، سعودي ۳۰ مليونه او افغانستان ۲۹ مليونه مسلمانان لري. [ ترتيب کوونکی: احمدولي اڅکزی]

دمګړی د تر ټولو زياتو مسلمانانو ټاټوبی د اندونيزيا هيواد دی. خو د امريکايي فکر خونې (PEW) د يوې څېړني پايلي ښيي چي تر ۲۰۵۰ کال پوري به د هندي مسلمان وګړو شمېر ۳۱۱ مليونو انسانانو ته جګ سي. هغه وخت به د هند مسلمانان د نړۍ د ټولو مسلمانانو ۱۱ فيصده او په دې توګه په يو هيواد کي تر ټولو زياته برخه وي. تر ۲۰۵۰ پوري به په هند کي د هندوانو شمېر ۱۳۰۰ مليونو ته جګ سي.

په هند کي د ماشومانو د زېږېدنې د لوړي شرحي له کبله په دغه هيواد کي د ځوانانو او منځني عمر لرونکو فيصدي زياته ده. د هند د مسلمانانو له نفوس څخه ميديان (رياضي) عمر ۲۲ کاله دی. حال دا چي د هندوانو ۲۶ او د هندي عيسويانو ميديان عمر ۲۸ کاله دی.

په هند کي هره مسلمانه ښځه اوسط ۳،۲ ماشومان زېږوي، حال دا چي هندو مېرمني اوسط ۲،۵ ماشومان راوړي. د هند په مسيحي ښځو کي هره مېرمنه اوسط ۲،۳ ماشومان زېږوي.

په هند کي د مسلمانانو په نفوس کي په دوامداره توګه اضافه سوې ده. په ۲۰۱۰ کال په هند کي د مسلمانانو نفوس د ټول هيواد ۱۴،۴ فيصده ؤ. خو اټکل کيږي چي په هند کي به تر ۲۰۵۰ پوري د مسلمانانو د نفوس فيصدي و ۱۸،۴ فيصدو ته جګه سي. خو د هغه باوجوده به په دغه هيواد کي د هرو څلورو وګړو څخه ۳ هندوان وي.

د (PEW) د څېړني له مخي به په هند کي تر ۲۰۵۰ کال پوري د مسيحيانو فيصدي کمه سي. په داسي حال کي چي دمګړی د هند د نفوس ۲،۵ فيصده مسيحيان دي، تر ۲۰۵۰ پوري به دغه فيصدي و ۲،۳ ته راټيټه سي.

د يادي څېړني له مخي اټکل سوی چي تر ۲۰۵۰ کال پوري به په هند کي د هندوانو شمېر دومره زيات سي، چي که د هند، پاکستان، اندونيزيا، نايجيريا او بنګله دېش ټول مسلمان نفوس سره يوځای کړل سي، نو بيا به هم د هندي هندوانو شمېر باندي زيات وي.

د دغې څېړني له مخي په نړۍ کي د مسلمانانو نفوس د نورو ټولو په پرتله په چټکۍ مخ په زیاتېدو دی. د (PEW) راپور له مخي د نړۍ د نورو انسانانو په پرتله به په راتلونکي کي هم د مسلمانانو شمېر تر ټولو په زيات سرعت مخ په زیاتېدو وي.

د افغانستان نفوس تقريبا ۲۹ مليونه اټکل کيږي چي ۹۹،۸ يې مسلمانان دي. په دې توګه د افغانستان د مسلمانانو د زيات نفوس لرونکو هيوادونو په ليسټ کي ۱۴ مقام لري. [د دغه انځوريز مطلب معلومات د pewresearch.org له پاڼي څخه د ۲۰۱۷ کال د مارچ په ۴مه نېټه اخيستل سوي. ترتيب کوونکی: احمدولي اڅکزی]