د خیبر پښتونخوا سلمانیان نور فیشني ږیرې نه جوړوي
۱۳۹۶ اسفند ۱۶, چهارشنبه
د فرانسې خبري آژانس په خپل رپوټ کې لیکلي دي چې دغسې یوه پریکړه څه د پاسه یوه لسیزه تر مخه هم هغه مهال شوې وه چې د طالبانو په گډون یاغي ډلو سلمانیانو ته د فیشیني ږیرو د ورجوړولو په هکله خبرداری ورکړی وو.
د سلیماني هیر ډریسر ایسوسي ایشن، یا اتحادیې مشر شریف کاهلو، په یوه خبري کانفرانس کې وویل: «د ږیرو بیلا بیل ډولونه جوړول د اسلام د پيغمبر د سنتو خلاف کار دی.»
کاهلو وویل چې نور په زرونو سلمانیان چې د دوی د اتحادیي غړي دي دغې پریکړې ته د ژمنتيا خبره کړې ده. د هغه په خبره په ټول ایالت کې به د سلمانیانو په دوکانونو کې د مشتریانو د معلوماتو له پاره دغسې یوه خبرتیا ځوړنده شي.
کاهلو دا خبره رد کړه چې ګنې د کومې وسله والې ډلې له لوري د دغه ګام د اخیستو له پاره پر فشار اچول شوی. د سلمانیانو د اتحادیې مشر وویل: «موږ د ایالت (خیبر پښتونخوا) د ټولو سترو ښارونو او ولسوالیو له ځایي ادارو سره ولیدل او ټولو موږ ته د خپلې بشپړې همکارۍ ډاډ راکړ خو له دې یي ډډه وکړه چې دغه څه رسمي کړي.»
په تیرو کلونو کې په خیبر پښتونخوا کې یاغیانو د سلمانیانو پر دوکانونو حملې کړې وې او د ږیرې خریل یې غیر اسلامي بللي ول.
نوموړي خبري آژانس لیکلي دي چې په وروستیو کلونو کې د پاکستان په سترو ښارونو لکه کراچۍ او لاهور کې د نارینه وو تر منځ دا دود شوی چې د نوي فیشن له پاره د نارینه وو آریشګاوو ته ځي. زیاته شوې ده چې دغه دود د منځني قشر تر منځ زیات لیدل کیږي.
زموږ له ارشيف څخه: