د نړۍ خبرونه په متن او انځور کې

د نوي کال په پلمه د آلمان صدراعظمې انګلا مېرکل پر آلمانانو باندې د ډاډمنتيا او باورتيا غږ کړی دی. د حکومت د مشرې په وينا کې راغلي وو چې «تر ټولو سخت امتحان» په ۲۰۱۶ کال کې «بې له شکه اسلامپاله ترهګري» وه. په تېره د برلين پر کريسمس بازار باندې د بريد په تړاو چې ۱۲ انسانان يې ووژل، د «سي ډي يو» ګوند مشرې ټينګار وکړ چې دولت هر هغه څه کوي څو خپلو وګړو ته د امنيت تضمين په آزاده فضا کې وشي کولای.

د عراق په پلازمېنه بغداد کې غبرګو بريدونو لږ تر لږه ۲۵ انسانان وژلي او ډېر نور ژوبل کړي دي. د کورنيو چارو وزرات په حواله دوه بريدونه شوي دي چې يو بريد د ځانمرګي بريدګر په واسطه تر سره شوی. تر اوسه پورې يې چا پړه نه ده منلې. په تېرو وختونو کې د «اسلامي دولت» په نوم ترهګرې ډلې په بغداد کې تل ملکي خلک په نخښه کړي ول. عراقي ځواکونه اوسمهال هڅه کوي چې داعش له موصل ښاره څخه وباسي.

په سوريه کې د روسیې او ترکيې په منځګړيتوب پلی شوی اوربند تر ډېره ټينګ دی، يوازې کله ورڅخه سرغړونه شوې ده. د بشري حقونو له پاره د سوريې څارونکي سازمان د پوځ او ياغيانو تر منځ په هما ولايت کې او د پلازمېنې دمشق په شاوخوا کې د نښتو خبر ورکړی دی. روسيه په ملګرو ملتونو کې د خپل سفير، ويتالي چورکين، په قول هڅه کوي د يوه پرېکړه ليک د لارې د ملګرو ملتونو د امنيت د شورا ملاتړ خپل کړي.

د آلمان د پرمختيايي چارو وزير دا خبره ردوي چې تونس ته دې د پرمختيايي مرستو د کمولو ګواښ وشي، څو دغه هېواد خپل رد شوي پناه غوښتونکي بېرته ومني. ميولر د «وېلټ آم زونتاګ» ورځپاڼې ته وويل چې هغه به خپله په «ډېر ټينګار» سره د دې غم وخوري چې تونس خپل مسووليتونه تر سره کړي. خو د دغه وزير په خبره د پرمختيايي همکارۍ د پروګرامونو کمېدل د ګټې پر ځای تاوان لري.

د متحده آيالاتو منتخب ولسشمر، دونالد ټرمپ، د روسيې ولسمشر، ولاديمير پوتين، تر حده زيات ستايلی دی ځکه چې د نويو امريکايي بنديزونو سربېره يې اوسمهال متقابل اقدامات نه دي پورته کړي. ټرمپ د تويتر د لارې وليکل چې «دا يو ډېر عالي ګام» دی او دا چې دی تل پوهېده چې پوتين «ډېر هوښيار» دی. پوتين، له متحده آيالاتو څخه د روسي ديپلوماتانو تر شړل کېدو وروسته ويلي ول چې دی به په ورته يو اقدام لاس پورې نه کړي.

د متحده آيالاتو په وېرمونت آيالت کې د برېښنا په يوه شرکت کې يو کمپيوټري ويروس وموندل شو. د بورلينګټن ښار د برېښنا شرکت وويل چې داسې يو لاپټاب په ويروس اخته شوی دی چې د انرژۍ له مزو سره البته وصل نه دی. د شوو څرګندونو له مخې هغه يو مضر کمپيوټري پروګرام دی چې د «ګريزلي سټېپ» په نوم له يو هېکري پروګرام او په يوې روسۍ څارګرې ادارې پورې تړاو لري.

يوې ترکۍ محکمې د يوه مشهور منتقد ژورناليست د نيولی امر کړی دی. دولتي خبري اژانس انادولو خبر ورکوي چې احمد سيک بايد د «جمهوريت» په نوم د اپوزيسيون په ورځپاڼه کې د ليکنو له کبله بندي شي چې پکې يې پر ترکي استخباراتو باندې انتقاد کړی وو. بل تور ورباندې دا دی چې د يو کيڼ اړخي ګوند او د اسلامي واعظ، فتح الله ګولن د شبکې له پاره يې تبليغات کړي دي.