د نړۍ مهم خبرونه په متن او انځور کې

تېر کال په آلمان کې پر لږ تر لږه ۹۵۰ مسلمانانو او د جوماتونو په څېر په مسلمانانو پورې پر مربوطو ودانيو باندې بريدونه شوي دي. دغه خبره د آلمان د کورنيو چارو د وزارت له هغو معلوماتو څخه څرګنديږي چي د کيڼ ګوند د فراکسيون د يوې پوښتنې په جواب کي يې ورکړي دي. دغه معلومات د «نوې اوسنابرويکر» ورځپاڼې له خوا خپاره شوي چې په حواله يې په دغسې پېښو کې ۳۳ تنه ژوبل شوي دي.

د آلمان د سوسيال دموکراتانو له خوا له اتحادي ګوندونو سره د لوی ائتلاف په سر تر رايې اچونې وروسته نن د برلين په ويلي براند ودانۍ کې د رايو شمېرنه شروع شوې ده. ۱۲۰ تنه رضاکاره مرسته کوونکي د ګوند په مرکز کې د رايو د شمېرلو پر کار باندې بوخت دي. د دغې رای اچونې پايله چې په ټوله اروپا کې ورته په تلوسې سره انتظار کيږي، به سبا د يکشنبې په سهار اعلان شي.

د اوکراين پوليسو په پلازمېنه کيف کې د پارلمان مخکې لګېدلی د خېمو يو کمپ خالي کړی دی. د پوليسو په حواله شپږ تنه مظاهره چيان او څلور امنيتي ځواکونه ژوبل شوي دي. د چارواکو يوه وياند دا هم وويل چې په دغه پېښه کې تقريبا سل تنه په موقت ډول نيول شوي يا د شخصي احوالو په وړاندې کولو مجبوره شوي دی. په خبره يې ډېر لاسي بمونه هم ورسره نيول شوي دي.

د بريتانيې صدراعظمې، تېريزا می، په اروپايي اتحاديه کې د خپل هېواد د غړيتوب په سر دويمه ټولپوښتنه يو ځل بيا په کلکه رد کړې ده. می د «دي وېلټ» ورځپاڼې ته وويل: «د بريتانيې ولس تصميم نيولی چې اروپايي ټولنه به پرېږدي او دغه کار به د ۲۰۱۹ کال د مارچ په ۲۹مه وهم کړو.» د هغې په خبره د ۲۰۱۶ کال د ټولپوښتنې د نتيجې عملي کول د اعتماد يوه مساله ده.

يوه سخت ژمني توپان د متحده آيالاتو د ختيځ ساحل په اوږدو کې ترافيک مختل او برېښنا قطع کړې ده چې لږ تر لږه پنځه تنه يې وژلي هم دي. د «رايلې» په نوم توپان ډېرې سيمې په واورو او اورښتونو وپوښلې او د سختو بادونو باعث هم وګرځېد. د ماساچوسېتس څخه تر نيو جېرسي پورې پرته سيمه اغېزمنه شوې ده. لږ تر لږه پنځه تنه د چپه شوو ونو او ماتو شوو ښاخونو له کبله وژل شوي.

په سلواکيا کې په زرګونو کسان د وژل شوي پلټونکي خبريال، يان کوچياک، په ياد کوڅو او سړکونو ته سره راوتلي دي. يوازې په پلازمېنه براتيسلاوا کې د جمعې په ماښام د لاريون د سمبالونکو په حواله تقريبا ۲۵ زره تنه يوه مارش ته سره راټول شول. په نورو ځايونو کې هم احتجاجونه او د وير د څرګندولو مراسم شوي دي. کوچياک تېره يکشنبه په خپل کور کې له خپلې وژل شوې نامزادې سره يو ځای موندل شوی و.

په ايټاليا کې د انتخاباتي مبارزو په پای کې د حاکمو سوسيال دموکراتانو مشر، ماتېو رېنڅي، و قدرت ته د افراطيانو له رسېدو څخه خبرداری ورکړی دی. دغه پخواني صدراعظم وويل چې که د هغه «پي ډي» نومی ګوند د يکشنبې ورځې په پارلماني انتخاباتو کې تر ټولو مخکښه سياسي ځواک جوړ نه شی، کېدای شي يو «افراطي او تندلاری حکومت» قدرت ته ورسيږي.