د پاکستان پوځ وايي خيبر پښتونخوا کې ۵ عسکر وژل شوي
۱۴۰۳ تیر ۲, شنبه
د پاکستان پوځ ويلي چې دغه پېښه د جمعې په ورځ د جون ۲۱مه د خيبر پښتونخوا ایالت په کورمه ايجنسۍ کې رامنځ ته شوې ده. کورمه یوه غرنۍ سیمه ده چې له اوږدې مودې راهیسې پکې د پاکستاني طالبانو او ځايي داعش په ګډون وسلوالې ډلې فعالې دي.
د پوځ په اعلامیه کې راغلي دي چې «يو په لاس جوړ بم د امنيتي ځواکونو پر یوه موټر باندې چاودلی دی.»
پوځ زیاته کړې چې په دغه چاودنه کې د دوی «د دغې خاورې پنځه زړور بچیان» له منځه تللي دي.
د فرانسې خبري آژانس تېره ورځ ويلي وو چې د دغه برېد مسئولیت تر اوسه چا په غاړه نه دی اخیستی. په سيمه کې د پاکستان پر امنيتي ځواکونو ډېری حملې تحریک طالبان پاکستان (TTP) کوي.
په خیبر پښتونخوا کې د پاکستان پر امنیتي ځواکونو ډېرې حملې کیږي. د روانې میلادي میاشتې په سر کې د دغه ایالت په لکي مروت کې په یوه حمله کې د پاکستان ۷ عسکر وژل شوي ول.
(AFP)mks/akh