د کرونا پرضد به بې پیلوټه الوتکي وکارول سي؟
۱۳۹۹ فروردین ۲۲, جمعه
د پولیسو اتحادیه بې پیلوټه الوتکو ته د کرونا د بحران پر وخت د خلکو د تګ راتګ د کنترول له پاره د یوې ممکنه آلې په سترګه ګوري.
د نوموړي ادارې معاون یورګ رادیک، ویلي دي چي د بې پیلوټه الوتکو کارول به له پولیسو سره مرسته وکړي چي په لویو ښارونو کي د تجمع پر مرکزونو او یا هم پارکونو باندي لا ښه څارنه وکړي.
دغه الوتکي کولای سي په هدفمندانه ډول د خلکو تجمع تر څارني لاندي ونیسي. همدارنګه د آلمان د پولیسو د اتحادیې مشر ویندت، په ښکاره ډول د دغو الوتکو د کارولو خبره وکړه. هغه ددغه هیواد د کورنیو چارو وزارت څخه غوښتنه وکړه چي د دا ډول الوتکو ظرفیت لاپسي ډیر کړي.
تر اوسه له بې پیلوټه الوتکو څخه د خلکو د تجمع د کنترولولو له پاره یوازي په استثنايي حالاتو کي کار اخیستل کیږي.
د جرمني د نورد راین ویستفالین ایالت د پوليسو لس ادرې اوس د دوو دوو بې پیلوټه الوتکو ماموریت آزمايي. لکه څنګه چي د پولیسو د مرکزي ادارې یوې ویاندي ویلي دي، د دغو الوتکو آزموینه په دوسلدورف او دورتموند کي د کرونا بحران پر وخت تر سره سوې.
دغه کوچنۍ الوتکي به د نورو ترڅنګ دا وظیفه پر غاړه ولري چي هغه ځایونه په نښه کړي چي ډیر خلک پکښي راټولیږي او بیا د لوډ سپیکر له لاري هغوي ته د ناروغیو د خطر په هکله خبرداری ورکړي. دغه خبرداری د ګزمي پر وخت د عادي پولیسو خبرداري ته ورته دی.
د تصویرونو نه ثبتیدل
د دوسلدروف د پولیسو یوه ویاند ټینګار کړی دی چي د بې پیلوټه الوتکو کمرې به د یوه انسان څیره په واضح ډول نه ښيي. همدارنګه به هیڅ تصویر نه ثبتیږي. دلته خبره یوازي پر څارني باندي ده. تر ټولو د مخه د هغو سیمو څارنه چي سړی یې په آساني سره نه سي کنترولولای.
دا چي دغه ډول څارنه به د ایستر د اختر د ورځو پر وخت هم کیږي، د دوسلدورف او دورتموند چارواکو یې په اړه څه نه دي ویلي.
همدارنګه د هیسن ایالت پولیس هم ۱۰ دغه ډول الوتکي چی بیلابیلي اندازې لري، په اختیار کي لري. خو د کورنیو چارو وزارت په خبره، د کرونا د بحران پر وخت تر اوسه پوري یوازي له یوې څخه کار اخیستل سوی دی.
په میکلینبورګ فورپومیرن کي بیا د ژغورني عملې یوازي یوه بې بیلوټه الوتکه کارولې ده، هغه هم د ریوګن د ټاپو د ساحل د کنترول له پاره. ددغو الوتکو کامري کولای سي د کباب اخیستلو پر وخت د هغه د اوربلولو عکسونه هم واخلي.
د آلمان په ډیریو ایالتونو کي پولیس په اوس وخت کي له عادي میتودونو څخه کار اخلي تر څو د کرونا بحران له قیوداتو څخه د سرغړوني پیښي کشف او هغه وڅیړي.
د نیدرزاکسن ایالت د پولیسو یوې ویاندي ویلي دي چي د لوډسپیکرونو له لاري خلکو ته لارښووني کوي، خو هغه په راتلونکي کي د دې کار له پاره د بې پیلوټه الوتکو ګومارل هم له امکانه لیري نه بولي.
همدارنګه د بایرن ایالات هم په اوس وخت کي د بې پیلوټه الوتکو کارول ضروري نه بولي او ددغه ایالت د کورنيو چارو وزارت په حواله به په اول سر کي حالت همداسي دوام پیدا کړي.
د جرمني ځینو نورو ایالتونو هم ویلي دي چي د کرونا د بحران پر وخت د څارني له پاره به دغه ډول الوتکي ونه کاروي.
زموږ له آرشیف څخه: