طالبان: د هوايي ډګرونو د هوايي حريم کنترول تړون لاسليکيږي
۱۴۰۱ شهریور ۱۷, پنجشنبه
د افغانستان د ترانسپورت او ملکي هوايي چلن وزارت مرستيال مشر غلام جيلاني پوپل د پنجشنبې په ورځ په کابل کې د يوې مطبوعاتي غونډې په ترڅ کې خبريالانو ته ويلي دي چې طالبانو لا دمخه د جي آې آې سي شرکت سره چې په متحده عربي اماراتو پورې تړاو لري، د ځمکنیو خدماتو او امنيت په اړه تړونونه کړي دي.
دا تړونونه به له طالبانو سره د منزويتوب په له منځه وړلو کې مرسته وکړي. تر اوسه د نړۍ يوه هيواد هم په افغانستان کې د دغه ډلې حکومت په رسمیت نه دی پيژندلی او د بندیزونو پلي کيدو د هيواد اقتصاد له ستونزو سره مخ کړی دی. دغه تړونونه له اماراتو سره مرسته کوي چې له قطر سره د ديپلوماتيک نفوذ پر سر سيالۍ کې يو څه برلاسي شي.
د کابل په ګډون د درو هوایي ډګرونو د خدماتو قرارداد لاسلیک شو
رويترز خبري آژانس ليکلي چې د جي آې آې سي عمومي مدير او سيمه ایز مشر ابراهيم مورافي خبريالانو ته وويل چې دا ګام به ستر نړيوال هوايي شرکتونه بيرته افغانستان ته ستنېدو ته وهڅوي.
نوموړي ويلي دي: «زموږ په آند دا يو ډېر د پام وړ پرمختګ دی.» هغه زياته کړې: «موږ په دې هم باوري يو چې دا د پام وړ پرمختګ به د کار ځايونو په رامنځته کولو سره[افغانستان ته] اقتصادي ګټه هم ولري.»
د طالبانو حکومت چې د نړيوالو له خوا په رسميت د نه پيژندل کيدو له کبله منزوي دی، له سيمه ایزو هيوادونو چې قطر او ترکيه هم پکې شامل دي، د کابل د هوايي دګر د چارو د پرمخ وړلو غوښتنه کړې وه.
ترکیې د کابل هوايي ډګر د چارو سمبالولو له پاره شرط ايښی
خو طالبانو تر څو مياشتو خبرو اترو وروسته چې په يوه پړاو کې یې د اماراتو، قطر او ترکیې ترمنځ د يوه تړون امکانات هم رامنځته شوي ول، په دې وروستيو مياشتو کې پريکړه وکړه چې د ټولې چارې په بشپړه توګه متحده عربي اماراتو ته وسپاري.