په کراچي کې پهلواني

په کراچي کې د می میاشتې د ۱۷ نیټې څخه په نمایشي لوبو کې د نړۍ ۱۹پهلوانانو برخه اخيستې ده.

د دغو لوبو یوه ځانگړنه دا ده چې پاکستان ته په تللو پهلوانانو کې څلور پهلواناني هم شته چې په کراچي کې یې په زړه پوري لوبه نندارې ته وړاندې کړه.

د نمایشي لوبو تر پیلیدو دمخه د پهلوانانو تود هرکلی وشو او د لوبې تر پیلیدو دمخه اور لوبې هم وشوې.

پاکستان ته په تللو مسلکي پهلوانانو کې پخواني نوموتي لوبغاړي لکه کارلیټو او ویډبیرټ هم شامل دي.

په کراچي په ترسره کیدونکو دغو سیالیو کې د پام وړ لوبغاړو کې ټایني آیرن او پاکستاني الاصله فرانسوی بادشاه پهلوان خان، نوم هم شامل دی.

په لومړۍ لوبه کې د الجزایر پهلوان ریسلر یاسین عثماني ایټالوی پهلوان فیبیو فیراري مات کړ. په بله لوبه کې ایډم فیلکس بریالی شو.

د کراچي په سپورټ کمپلیکس کې دغه نمایشې لوبې وشوې چې پکښې د لوبو د تر سره کیدو له پاره رینگ جوړ شوی وو.

پاکستاني نندارچیانو تر ټولو زیات د بریتانوي پهلوان ټایني آیرن لوبه خوښه شوه. هغه په یوه وخت کې له دوو پهلوانانو سره سیالي کوله.

په پاکستان کې په اول وار د دغو نمایشي سیالیو له لیدلو سره ډیره لیوالتیا وښوول شوه او څه کم شپږو زرو کسانو د لوبې له نندارې څخه خوند واخیست.

د لوبو تر پیلیدو دمخه مراسمو کې ټولو بهرنیو پهلوانانو په پاکستان کې د دغو سیالیو د جوړولو هرکلی وکړ او هیله یې وښوده چې په پاکستان کې د پهلوانۍ مینه والو ته د دغو لوبو په واسطه خوښي وروبخښي.

د دغو نماشي لوبو دوهمه مرحله د می مياشتي پر۱۹ نیټه په لاهور کې او دریم پړاو د می پر ۲۱مه په اسلام آباد کې تر سره کیږي. (عنبرین فاطمه، کراچۍ)