کرزي ناټو ته د اخري وار دپاره اخطار ورکړی
۱۳۹۰ خرداد ۹, دوشنبه
وروسته له هغې چي د ناټو ځواکونو په يوه هوايي حمله کي۱۴ملکي کسان ووژل، حامد کرزي وويل چي د ملکي کسانو د وژلو په برخه کي يې دا واشنگټن ته اخري اخطار دی.
د شنبې په ورځ د هلمند ولايت په نوزاد او د يکشنبې په ورځ د نورستان ولايت په دو آب ولسواليو کي شاوخوا ۵۲ تنه ملکي وگړي او افغان پوليس په هوايي بريدونو کي ووژل سول.
د هلمند په پيښه کي ۱۲ تنه ښځي او ماشومان او د نوروستان په پيښه کي ۱۸ ملکي وگړي او ۲۰ تنه افغان پوليس ووژل سول.
د کرزي دفتر ويلي چي ولسمشر دغه پيښه په کلکه غندلې او دايي د ناټو يوه ستره تيروتنه بللې.
د جمهوررئيس دفتر دغه راز ويلي چي، ولسمشرکرزي د افغانستان د خلکو لخوا د اخري وار له پاره ناټو ځواکونو ته اخطار ورکړی چي دغه ډول پيښو ته د پای ټکی کښيږدي.
ولسمشر کرزی دغه پيښي ډير په غوسه کړی او ويلي يې دي، چي په افغانستان کي د امريکا په مشرۍ پوځي عمليات «په خپل سر او غير ضروري» دي.
بله خوا په افغانستان کي د ناټو ځواکونو په يوه خپره سوې خبرپاڼه کي په هلمند کي د نهو تنو ملکي وگړو د وژل کيدو په اړه بخښنه غوښتې.
په خبر پاڼه کي د افغانستان په جنوب غرب کي د ناټو ځواکونو قوماندان، جنرال جان تولن، له خولې ليکل سوي:«زه غواړم چي د هلمند ولايت په نوزاد ولسوالۍ کي د بهرنيو ځواکونو د عملياتو په ترڅ کي د نهو ملکي وګړو د وژني له پاره بخښنه وغواړم.»
ناټو دا هم منلې ده چي په نورستان کي يې د يکشبنې په ورځ ملکي وگړي او افغان پوليس په نښه کړي دي.
د نورستان والي، جمال الدين بدر، ويلي چي دغه پوليس او ملکي وګړي د ناټو ځواکونو لخوا په خطا کي وژل سوي دي:
«ناټو ځواکونو پر هغه سيمي بمبار کړی چي افغان پوليسو څه عمر د مخه د طالبانو څخه نيولې.»
د ناټو په عملياتو کي د ملکي وگړو وژنه په افغانستان کي په يوه ډيره حساسي موضوع بدله سوې، چي پدې ورستيو کي يې د ولسمشر کرزي او ناټو دغړو هيوادونو تر منځ اړيکي خړي پړي کړي دي.
آژانسونه/ مسعود جهش
کتونکی: نجيب الله زیارمل