په ۲۰۲۴ کال کې ۱۰۴ خبریالان وژل شوي
۱۴۰۳ آذر ۲۱, چهارشنبه
د خبریالانو د نړیوال فدراسیون (IFJ)د رپوټ په اساس په روان میلادي کال کې د ټولې نړۍ په کچه ۱۰۴ تنه د رسنیو فعالان او ژورنالیستان وژل شوي چې تر نیمایي ډیرو یې د غزې په جګړه کې خپل ژوند له لاسه ورکړی دی.
د دغه سازمان په وینا د ۲۰۲۴م کال په اوږدو کې ۵۵ فلسطیني خبریالان په دې سیمه کې وژل شوي دي. د ژورنالیستانو د نړیوال فدراسیون مشر انتوني بلانګر، د فرانسې خبري آژانس ته وویل چې ډیری خبریالان په غزې تړانګه کې «په قصدي توګه په نښه شوي دي».
د دغه فدراسیون په وینا: «د ۲۰۲۳م کال د اکتوبر په اوومه د جګړې د پیلیدو راهیسې، ۱۳۷ فلسطیني خبریالان وژل شوي دي.» بلانګر هغه «قتل عام چې د نړیوالو د سترګو مخته ترسره کیږي» وغنده.
نوموړي زیاته کړه که څه هم په روان میلادي کال کې د وژل شویو خبریالانو شمیر د تیر کال په پرتله لږ څه کم شوی دی، خو ۲۰۲۴ م کال هم د خریالانو له پاره یو ډیر خونړی کال و. د دغه سازمان د شمیرو له مخې په ۲۰۲۳م کال کې په ټوله نړۍ کې ۱۲۹ خبریالان وژل شوي وو.
اسیا، د خبریالانو له پاره دویم تر ټولو خطرناکه سیمه
له منځني ختیځ وروسته اسیا په نړۍ کې د خبریالانو له پاره دویم تر ټولو خطرناکه سیمه شمیرل کیږي. په دغه لویه وچه کې په روان میلادي کال کې ۲۰ خبریالان وژل شوي دي چې له دې ډلې ۶ تنه یې په پاکستان کې، ۵ په بنګله دیش او ۳ تنه په هندوستان کې وژل شوي دي. په اروپا کې هم ۴ تنه خبریالان د اوکراین په جګړه کې وژل شوي دي.
د خبریالانو بندي کیدل
د وژل شویو سربیره د خبریالانو نړیوال فدراسیون رپوټ ورکړی دی چې اوس مهال په ټوله نړۍ کې ۵۲۰ تنه خبریالان بندیان دي. د تیر کال په پرتله په دې شمیر کې ۱۰۰ کسان زیات شوي دي.
د دغه بنسټ له خوا وړاندې شوي شمیرې معمولاً د ارقامو را ټولولو د متفاوتو میتودونو له کبله له هغو شمیر څخه لوړې وي چې د بې پولي خبریالانو سازمان (RSF) له خوا خپریږي.