له افغانستانه د آستراليايي ځواکونو بشپړه وتنه

آستراليا په اپريل مياشت کې اعلان کړی و چې خپل ځواکونه به د متحده آيالاتو له هغې پرېکړې سره سم له افغانستانه وباسي چې غوښتل يې تر سپتمبره پورې خپل پوځي ماموريت پای ته ورسوي. 
د آستراليا د دفاع وزير، پيټر داټن، سکای نيوز ته ويلي دي چې خپل وروستی حمايوي پرسونل يې په وروستيو څو اونيو کې له  افغانستان څخه وتلی دی. د هغه په خبره دا په دې معنی نه ده چې له متحده آيالاتو سره يو ځای به په احتمالي کمپاينونو کې برخه نه اخلي، که هغه د آستراليا يا د نورو متحدينو د ملي منافعو په چوکاټ کې وي. خو په خبره يې بايد اوسنی پوځي کمپاين پای ته ورسيږي.
آستراليا په تېرو شلو کلونو کې د متحده آيالاتو او ناټو په مشرۍ د عملياتو په ترڅ کې ۳۸ زره پوځيان افغاستان ته لېږلي ول څو د طالبانو او په افغانستان کې د ترهګرو ډلو پر ضد عمليات وکړي. دغه ماموريت په میليارډونو ډالرو لګښت لرلی دی او ۴۱ آستراليايي سرتېري پکې وژل شوي دي.  
سره له دې چې آستراليا په افغانستان کې يوازې لږ ځواکونه ځای پر ځای کړي ول، ځکه چې په ۲۰۱۳ کال يې لا خپل جنګي ځواکونه ايستلي ول، خو په کور دننه د اوښتو تلفاتو له کبله له دغه ماموريت سره مخالفت موجود وو. 
پخوانو آسترالیايي عسکرو پر حکومت فشار راوستی دی چې د افغانستان د جګړې په پخوانو سرتېرو او نورو قرارداديانو کې د ځان وژنې د ډېرو پېښو له کبله دې يې رسمي څېړنه وشي. همداراز د پوځ او پوليسو په ليکو کې د داسې تورونو له کبله پلټنې جريان لري چې د ځانګړو هوايي ځواکونو له خوا ښايي په افغانستان کې ډېر جنګي جنايتونه تر سره شوي وي.

  AFP/N.S/K.H